Cesar

De Vicipedia
Salta a: naviga, xerca

Gaio Julio Cesar (Julio 100 aec - 15 Marto 44 aec) ia es un comandor militar, un politiciste e autor a la fini de la Republica Roman. El ia deveni un membro de la triumvirato prima e cuando lo ia rompe, el ia fa un gera interna contra Pompeio la Grande. Cuando el ia gania la gera, el ia deveni la autocrata de la Republica Roman. El ia es asasinada par sua enemis en Roma a la "idus de marto", pd 15 Marto, 44 aec.

Julio Cesar ia nase en Italia sirca 16 Julio, 100 aec. On no sabe la dato esata. A la eda de 16, el ia deveni la xef de sua familia, e el ia es pronto menasada cuando Lucio Cornelio Sulla ia deveni autocrata. La familia de sua madre ia suplica per sua vive e Sulla ia acorda esitante, ma ia elimina sua erita. Per suporta sua familia, Cesar ia enscrive en la armada e ia vade a via de Roma. El no ia reveni pos la mori de Sulla en 78 aec.

Bust of Gaius Iulius Caesar in Naples.jpg

Cuando Cesar ia traversa la Mar Ejean, el ia es caturada par piratas, ci ia comanda ce sua familia rescati el. Pos cuando el ia es rescatida, el ia colie un marina e ia catura e mata la piratas. Cuando el ia reveni a Roma, on ia eleje el como un tribuno militar.

En 69 aec, on ia eleje el como quaestor. Sua sposa Cornelia ia mori en la mesma anio. Pos sua funera, el ia vade a Espania per completi sua periodo de ofisia. El ia reveni a Roma en 67 aec e ia sposi Pompeia, la neta de Sulla, ci el ia divorsa plu tarda. En 63 aec, el ia xerca e gania la eleje per prete alta (Pontifex Maximus) de la relijio de la stato de Roma.

Pos sua pretoria, el ia deveni la governor de Espania. Per paia sua creditores, el ia ofre sua suporta a Marco Licinio Crasso, un om multe rica de Roma. En Espania, el ia concista du tribus local. En loca de un parade de vinse en Roma, el ia eleje xerca la posto de consul, cual el ia gania en 59 aec.

Con Pompeio e Crasso, el ia formi la triumvirato prima, en cual el ia servi como reconsilior entre Pompeio e Crasso. La alia ia es fortida cuando Pompeio ia sposi Julia, la fio de Cesar. Cesar ia sposi denova con Calpurnia, la fio de un senator potiosa. Cesar ia proposa un lege per redistribui tera publica a la povres, cual ia es suportada par Pompeio e Crasso. La triumvirato ia envia soldatos per menasa sua oposores.

Con la acorda de sua asosiores, Cesar ia deveni la governor de Galia (Frans, Suiz, e Italia norde moderna). En la Gera de Galia, Cesar ia es la comandor de la armada roman contra la armadas de la deutx. El ia estende la rena de Roma a la Mar Norde. La gera ia es la tema de la obra Commentarii de Bello Gallico ("Comentas sur la gera de Galia") par Cesar.

Esta atenis ia dona un potia militar multe grande, e ia menasa la controla par Pompeio. Plu, Crasso ia mori en 53 aec. En 50 aec, la senato, gidada par Pompeio, ia comanda ce Cesar sperde sua armada e reveni a Roma, car el ia completi sua taxe como governor de Galia. Cesar ia teme ce el va es arestada si el reveni a Roma, e Pompeio ia acusa el de tradi.

Par causa de esta acusa, Cesar ia gida sua armada a Roma. Los ia crusi un rio peti nomida la Rubicon, ultra cual no armada ta debe crusi. Esta ata ia causa un gera interna. Pompeio e sua amis ia fuji. Cesar ia deside vade a Espania, con Italia su la controla de sua jeneral Marco Antonio. En Espania, Cesar ia vinse la armada de Pompeio. Alora, el ia vade a este per ataca otra armadas de Pompeio en Elas. A la Batalia de Farsalo, Cesar ia vinse la armada de Pompeio en Julio 48 aec.

En Roma en 48 aec, on ia eleje Cesar como autocrata per un anio. El ia xasa Pompeio a Egipte, do Pompeio ia es matada. El ia deveni envolveda en un gera interna en Egipte entre la fortes de la faraon enfante Pompeio 14 e Cleopatra, sua sore, sposa, e rea co-renante. En 47 aec, Cesar e Cleopatra ia vinse la faraon e Cleopatra ia deveni la sola faraon e la amor de Cesar asta sua mori, an si Cesar ia es ancora sposida a Calpurnia.

Pos completi la concista de Africa norde, on ia eleje el como autocrata per des plu anios. El ia comanda multe cambias a la governa, spesial los cual boni la vives de la popla comun. Un esemplo de la cambias ia es la boni de la calendario par ajunta un plu dia a cada cuatro anios per un anio estendeda. En febrero de 44 aec, on ia eleje el como autocrata per la resta de sua vive.

Ma a la "idus de marto" (marto 15) de 44 aec, cuando Cesar ia es vadente a la senato, el ia es asasinada par sirca 60 omes, comandada par Bruto, un senator e ami de Cesar. El ia es cotelida a 23 veses. Marco Antonio e Octavian (ci ia deveni plu tarda Augusto Cesar) ia fa un serie de sinco geras interna cual ia fini en la institui de la Impero Roman.