Braman

De Vicipedia
(Redirijeda de Brahman)
La "Om", un simbol de Braman, comprendeda como la sona prima cual on produi en la vive ("O") e la sona final de la vive ("mmm").

Braman sinifia la prinsipe universal la plu alta, la realia ultima en la universo. En la setas major de filosofia de induisme, lo es la causa material, efetante, formal, e final de tota cual esiste. Lo es permeante, ajenero, nonfininte, veria eterna e joia cual no cambia, an si lo es la causa de tota cambias. Braman como un conseta metafisical es la unia coerente su la diversia en tota cual esiste en la universo.

Braman es un parola sanscrito de la Vedas, e es conseti en induisme como la prinsipe creosa cual es realida en la mundo completa. Lo es la conseta clavin en la Vedas, e es discuteda multe en la Upanixades.

Braman es discuteda en testos indu con la conseta de Atman, "se mesma". En la setas dualiste de induisme, Atman e Braman difere en cada individua. En setas moniste, Braman es identical a Atman, es en tota locas e en cada vivente, e tota es liada en un spirito unida. Esta idea es alga simil a los de la platonistes de Elas e la mundo elinica: Los crede en un ultima, nomida "la Un", cual ave un estende nomida "Logos", cual ave un estende nomida "Psyche" (la spirito mundal), cual es mostrada como la spiritos de la viventes real. Esta es ance refletada en la ideas de gnosticisme e an la cristianisme, pe, de la evanjeliste Joan: "la Un" es la padre, "Logos" es Jesus, e "Psyche" es la spirito santa.

La nom "Braman" en sanscrito es un nom neutra, cual debe es distinguida de brahmán, un nom mas cual sinifia un person asosiada con Braman (un bramin), e de Brama, la dio creosa en la Trimurti ("trinity"). Braman es donce un conseta neutra e ajenero, e cual no pote es definida esata.

Braman es la conseta metafisical clavin en setas variosa de filosofia indu. Lo es la tema en discutes variosa sur la du demandas sentral de metafisica: cual es ultima real, e esce on ave prinsipes cual aplica a tota cual es real? Braman es la realia ultima, eterna, constante, en cuando la mundo de vive dial, la universo oservada es un realia de un tipo diferente cual es tempora e cambiante, nomida Maya.

En alga setas induiste, como la advaita vedanta, los discute du "Bramanes": un Braman nirguna e un Braman saguna. Nirguna sinifia la asentia de cualias, cual es la Braman vera, de ci nos no pote parla. Saguna sinifia la presente de cualias, pd un Braman de cual nos pote parla, ma es no la Braman ultima. Lo es un Braman limitada cual es disponable a nosa mentes limitada. Incluida en Braman saguna es la naras de la Vedas e otra scrives santa, e la avatares cual simboli la sajia normal nonconsetible. Estas pote es usada como un util per los ci es ancora sur sua viaja spirital, ma cual es desprendeda par la luminada.

La relata de la Atman individua (spirito) de cada person e Braman varia entre la setas diferente de induisme. Budisme e la seta de carvaka de induisme nega la idea ce cualce cosa como un spirito individua esiste, o an ce Braman esiste. La setas plu ortodox de induisme (e de jainisme e la ajivikas) crede ce la spirito personal esiste vera.

En advaita vedanta e ioga, on pote sabe Braman par reconose el en se mesma, donce la via a autoconose es la via a la conose de Braman. En otra setas, como la dvaita vedanta, cada spirito es limitada e distinguida de Braman. La plu prosima on pote veni es en la ama de Braman, videda como la dio ultima.

En la Chandogya Upanishad 6.8.7 etc, la relata de un person a Braman es espresada par la frase तत्त्वमसि (tat tvam asi), cual sinifia "tu es acel".