Ativa, pasiva e flexable
Ativa, pasiva, e flexable es roles en ativia sesal, spesial entre du (o plu) mases. Un ativa es normal un person ci penetra, un pasiva es normal algun ci deveni penetrada, e algun ci es flexable completi ambos roles. Esta termas pote es elementos de autoidentia cual indica la preferes e abituas usual de un individua, ma los pote ance descrive identias sesal e roles sosial plu larga.
En engles on refere a un ativa como un top, a un pasiva como un bottom, e a un flexable como un vers o versatile. On ave ance omes ci fa la seso con omes ma no fa la seso anal, partisipante en seso nonpenetrante en loca de esta; en engles, on ia comensa resente refere a los como sides.
Ativa
[edita | edita la fonte]Un ativa es usual un person ci completi la rol penetrante en ativia sesal; per omes ci fa la seso con omes, esta es frecuente la penetra de la ano o boca par la penis. Ativia pote ance descrive un identia personal plu larga, cual inclui la mostra de domina e autoria en un relata romantica o sesal; an tal, esta no es un elemento nesesada per es un ativa.
Pasiva
[edita | edita la fonte]Un pasiva es usual el ci reseta la penetra sesal. Esta refere frecuente a un om ci fa la seso con omes deveninte penetrada par la ano. Pasivia pote descrive ance un contesto sosial plu larga de sede en un relata romantica o sesal, ma esta elemento no pertine a tota persones ci prefere es pasiva.
En sesia ge mas, un pasiva total es algun ci es sola penetrada en seso anal o bocal. Un pasiva flexable es algun ci prefere es pasiva ma es ativa a veses. La terma resetor pote es prefereda par algas.
Flexable
[edita | edita la fonte]Flexable descrive un person ci jua ambos de ativia e pasivia, e ta pote an alterna entre la du en situas sesal.
Como la otra roles, flexablia pote nonobligante es un conseta cultural, no limitada a la ata simple de seso anal, bocal o vajinal, ma ance incluinte la divide de debes e obligas en la relata.
Frecuentia
[edita | edita la fonte]Un conta de 55.464 profiles en gay.com de SUA ia mostra ce 26,46% ia prefere es ativa, en ce 31,92% ia prefere es pasiva, e la grupo la plu grande (41,62%) ia prefere es flexable. An tal, la preferes ia pare varia entre statos. En Wyoming, per esemplo, 16% ia prefere es ativa, 44% ia prefere es pasiva, e 40% ia prefere es flexable. En Virginia Ueste, ativas ia es plu multe ca pasivas par un marjin peti (32% ativa, 29% pasiva, e 39% flexable). En Oregon, profiles "flexable" ia es cuasi dui (48,42%).
Un studia de la encontra sesal la plu resente entre omes ci fa la seso con omes ia trova ce sola 37,2% de partisipores ia fa seso anal, en ce 72,7% ia partisipa en seso bocal e 68,4% en masturba coletiva.