Alexandro la grande

De Vicipedia
Jump to navigation Jump to search
Alexandro la grande
Bust Alexander BM 1857.jpg

Informa personal

Nase: 20/21 julio 356 aec, Pella
Mori: 10/11 junio 323 aec, Babilon
Pais: Macedonia

Otra informas

Profesa: Re, faraon

Alexandro la Grande (o Alexandro 3 de Macedonia, 20/21 julio 356 aec – 10/11 junio 323 aec) (elinica: Ἀλέξανδρος ὁ Μέγας, de ἀλέξω "defende, aida" + ἀνήρ "om") ia es un re de Macedonia, un stato en Elas norde antica. El ia nase en 356, e ia es instruida par la filosofiste grande Aristotele asta la eda de des-ses. A la eda de tredes, el ia crea un de la imperos la plu grande de la mundo antica, un impero cual ia estende de la Mar Ionio a la Himalaias. El ia es nonvinseda en batalia e es regardada como un comandor la plu susedosa en istoria.

Alexandro ia segue sua padre, Filippo 2 de Macedonia, a la trono en 336 aec pos la asasina de Filippo. Alexandro ia erita un rena forte e un armada esperiosa. El ia deveni la jeneral de Elas e ia usa sua autoria per comensa la intendes de sua padre per estende militar sua rena. En 334 aec, el ia invade Anatolia, cual ia es renada alora par la persianes, e ia comensa un serie de batalias cual ia dura tra des anios. Seguente, el ia suverti la re de la persianes, Darius 3, e ia concista intera la Impero Persian asta la Rio Indo.

El ia invade India en 326 aec, ma ia es forsada a verje a retro par la demandas de sua soldatos. Alexandro ia mori en Babilon en 323 aec, sin esecuta sua campanias intendeda cual ia ta comensa con la invade de Arabia. En la anios pos sua moria, un serie de geras interna ia destrui sua impero, e ia la resulta ia es un cuantia de statos separada e renada par la Diadoci, la jenerales e eritores survivente.

La lega de Alexandro inclui la difusas cultural causada par sua concistas. El ia fundi sirca dudes sites nomida per el, incluinte la plu notable, Alexandria en Egipte. La coloni de sua impero par elinicas e la estende de sua cultur en la este ia crea un sivilia elinica nova, de cual partes ia es ancora evidente en la cultur de la Impero Bizantian en la sentenio 15. Alexandro ia deveni lejendal como un eroe clasica simil a Acile, e el apare clar en la istoria e mitos de cultures elinica e nonelinica. El ia deveni un model per xefes militar, e academias militar tra la mundo ensenia ancora sua taticas.