Universo
La universo es tota de spasio e tempo e sua contenidas, incluinte planetas, stelas, galasias, e tota otra formas de materia e enerjia. La grandia spasial de la universo intera no es ancora conoseda, ma lo es posible ce nos pote mesura a min la universo vidable.
La modeles siensa la plu temprana de la universo ia es developada par filosofistes antica de Elas e India e ia es jeosentral, con Tera a la sentro de la universo. Tra la sentenios, oservas plu esata causa ce Nicolaus Copernicus ia developa la model eliosentral con la Sol a la sentro de la sistem solal. En developante la lege de gravita universal, Isaac Newton ia continua la obras de Copernicus e la oservas par Tycho Brahe e la leges de move de planetas de Johannes Kepler.
La bonis de modos de oserva ia condui a la reconose ce nosa Sol es un de sentos de biliones de stelas en un galasia nos nomi la Via Letin, cual es un de a min sentos de biliones de galasias en la universo. Multe de esta stelas ave planetas. A la proportio la plu grande, galasias es uniforma distribuida en tota dirijes, cual sinifia ce la universo no ave o un borda o un sentro. A proportios plu peti, galasias es distribuida en grupos e supragrupos cual formi filetas enorme e vacuas en spasio, creante un strutur vasta semblante spuma. Descovres en la sentenio 20 temprana ia sujesta ce la universo ia ave un comensa e ce spasio ia es cresente de la comensa, e ce la crese es aselerante.
La teoria de la Buma grande es la descrive de la developa de la universo la plu asetada oji. En esta teoria, spasio e tempo ia emerji con lunlotra sirca 13.799±0.021 bilion anios ante aora, con un cuantia de enerjia e materia fisada cual ia deveni min densa en cuando la universo ia crese. Pos un crese aselerada a la comensa de sirca 10 a 32 secondos, e la separa de la cuatro forsas fundal conoseda, la universo ia fri gradal e continua crese, permetente ce la particulas suatomica prima e atomes simple formi. Materia oscur ia asembla gradal e formi un strutur de filetas e vacuas su la influe de gravita. Nubes enorme de idrojen e elio ia es traeda gradal a la locas a cual la materia oscur ia es la plu densa, forminte la galasias e stelas prima, e tota otra cosas ce nos pote vide oji. On pote vide ojetos oji cual es plu ca 13.799 bilion anios de lus car spasio se mesma ia es estendeda, e es ancora estendente oji. Esta sinifia ce ojetos cual es aora asta 46 bilion anios de lus de nos pote ancora es videda en sua pasada distante, car en la pasada, cuando sua lus ia es emeteda, los ia es multe plu prosima a nos
Par studia la move de galasias, nos sabe ce la universo conteni multe plu materia ca nos pote deteta en la modos comun. Esta materia nonvideda es nomida materia oscur. La model nomida Lambda-CDM es la model la plu asetada de la universo. Lo sujesta ce sirca 69.2%±1.2% de la masa e enerjia de la universo es composada de enerjia oscur, cual causa la estende corente de spasio, e ce sirca 25.8% es materia oscur. Materia comun ("materia barional") es donce sola 4.9% de la universo. Stelas, planetas, e nubes gasosa vidable formi sola 6% de materia comun, o sirca 0.35% de la universo intera.
On ave multe otra ipoteses sur la destina ultima de la universo, e sur cual, si cualce cosa, ia presededa la Buma grande. Otra fisicistes e filosofistes refusa atenta divina, creante ce nos va aseta nunca la informa sur states presedente. Alga fisicistes ia sujesta ipoteses variosa de multiuniversos, en cual la universo es sola un entre multe universos cual ance esiste.