Roma antica

Article bon
De Vicipedia

Roma antica (en latina: Antiqua Rōma) ia es un unia political cual ia nase de la estende de la site de Roma, cual, en sua epoca culminante, ia estende de la Rena Unida asta la Sahara e de la Penisola Iberian asta la Eufrates. A la comensa, pos sua fundi (753 aec), Roma ia es un monarcia etrusca. Plu tarda, (509 aec), lo ia es un republica latina, e en 27 aec ia converti a un impero. A la periodo de brilia masima, lo ia es conoseda como pax romana per sua state de armonia cual ia domina en la rejiones su domina roman, un periodo de ordina e ricia cual la Impero ia conose su la dinastia de la Antoninos (96–192), e a grado min alta, su la Severos (193–235). Lo furni elementos esensal per la developa de la Ueste, e plu tarda de la Este.

Funda[edita | edita la fonte]

Seguente la tradision roman, Romulo (771–717 aec) e sua jemelo Remo (771–753 aec) ia es la fundores de Roma e de la Senato roman. La istoriografia de aora considera falsa esta tradision, e dona la sentenio 7 como la data de la orijina de la site.

Romulo e Remo, desendentes de Eneas, e netos de Numitor, ia fundi la site a 21 april 753. Numitor ia es desponeda de la trono per sua frate, Amulio. La fia de Numitor, Rea Silvia, ia pari la jemelos, ci ia es regardada como partal divin. Le re nova ia teme ce jemelos va prende la trono, donce el ia comanda ce on afoca los. Un lupo ia salva e eleva los, e cuando los ia es bastante vea, los ia redona la trono de Alba Longa a Numitor.

La jemelos alora ia fundi sua propre site, ma Romulo ia mata Remo en un disputa sur la loca de la rena roman. Alga fontes afirma ce la disputa ia es sur ci va governa o nomi la site. Romulo ia deveni la fonte de la nom de la site. Per atrae persones a la site, Roma ia deveni un refujeria per la escluida. Esta ia causa un problem a Roma, cual no ia ave femes. Romulo ia viaja a la sites e tribus visina e atenta securi diretos de sposi, ma Roma ia ave multe nondesiradas cual tota ia refusa. Un lejenda dise ce la romanes ia invita la sabines a un festa e ia ruba la femes nonsposida, causante la integra de la romanes e la sabines.

Otra lejenda, recolieda par la istoriste Dionisio de Halicarnaso, dise ce Eneas ia gida un grupo de troianes tra la mar per fundi la Troia nova, car la orijinal ia es destruida pos la gera de Troia. Pos longa tempo sur la mar, los ia ariva a la rivas de la Rio Tiber ma la omes ia vole reveni a la mar. La femes, ci ia viaja con los, no ia vole abandona la loca. Un fem, nomida Roma, ia proposa ce la femes arde la barcos. Prima, la omes ia es coler con Roma, ma ia comprende pronto ce los es en la loca ideal per coloni. Los ia nomi la colonia longo la nom de la fem ci ia torxi la barcos.

La poesiste roman Virjilio ia renara esta lejenda en sua poesia epica, la Eneida. Esta poesia nara como la prinse troian Eneas ia es destinada par la deos en sua emprende de fundi un Troia nova. En la epica, ance la femes ia refusa reveni a la mar, ma los no ia es abandonada en la Tiber. Pos ariva a Italia, Eneas, ci ia vole sposi Lavinia, ia debe declara un gera contra Turno, la corteor presedente. Longo la poesia, la res alban ia desende de Eneas, e donce Romulo, la fundor de Roma, ia es de desendente.

Monarcia distinguinte[edita | edita la fonte]

Article xef: Monarcia Roman

La site ia es governada par un re (rex) elejeda par un consilio de senesentes (senatus). La re de Roma es:

Res de la Monarcia Roman
* Romulo
* Numa Pompilio
* Tulio Hostilio
* Anco Marcio
* Lucio Tarcinio Prisco
* Servio Tulio
* Lucio Tarcinio la Orgolosa

La ultima ia es suvertida en 509 aec cuando la Republica ia es instituida.

Comensa de la monarcia (sentenios 8 e 7 aec)[edita | edita la fonte]

La monarcia roman pote es divideda en du periodos: la periodo un coresponde a la cuatro prima res lejendal a ci la analisores atribui la fundi de la instituidas political e relijial de la site. Esta ia es organizada en curias, senato e comitia curiata. Roma ia comensa multe geras de concista. En esta epoca on ia fundi la porto de Ostia e la ponte prima sur la Tiber ia es construida[1].

Familias aristocrata e sua divide en curias[edita | edita la fonte]

Seguente la tradision, la romanes antica ia es divideda en tre grupos, la Tities, la Ramnes e la Luceres. La orijina e la composa de esta tribus es un tema de debate per la istoristes. La familias cual parteni a un de esta tre grupos constitui la prima familias patrisio. Per organiza la site, esta familia patrisio ia es divideda en unias nomida curias. Contra esta, seguente la lejenda, esta organiza ia es fada par la re prima, Romulo. Cada de la tre tribus ia es divideda en des curias.

Crea de la Senato, de la comitia e de la Re de Roma[edita | edita la fonte]

Alga clanes opera en forma democrata, con ce cada membro ave la direto de vota. Otras es governada de forma aristocrata, organizada sirca un comite de veas. Cuando esta clanes ia uni per crea un comunia plu grande, la du metodos ia es conservada per governa.

La romanes prima ia espresa democrata tra un comitia (« asembla » o « comite »). La du asemblas xef formida ia es conoseda como comices curiates e comices calates. La asemblas ia es la survive de la propensas democrata de la prima clanes. Per respeta la forma de democratia direta de la clanes federada, a du comites ia es organizada de forma cual refleta plu bon la divide tribal de la site. La comices ia es organizada per curias. La membres de cada de la tre tribus (Ramnes, Tities e Luceres) es asiniada a un curia, con ce cada grupo ia es divideda en des curias.

La corespondente aristocrata de la asemblas ia prende la forma de un consilio munisipal de senesentes. En cuando la consilios de cada clan ia es composada de senesentes de la familias cual dirije la clan, la consilio munisipal es composada de senesentes ci parteni a la clanes dirijente de la site, un consilio cual ia deveni la Senato. Esta (seguente la lejenda) es composada de 300 senesentes (patres familias) veninte de cada de la tre tribus e constituinte la senatores roman prima.

La popla e la senesentes ia reconose la nesesa de ave un dirijor unica, nomida la rex. La popla ia eleje la re e la senesentes ia consela a el.

Monarcia tarda (sentenio 6 aec)[edita | edita la fonte]

La periodo du, plu rica en avenis ca la prima, ia vide la rena de la tre res lejendal ultima, la crese importante de la teritorio roman e la developa de la plebianes con sua integra partal en la strutur political de la site. Esta tre res ia governa seguente la erita. La tre res etrusca ia comensa un politica de concista.

La prima re etrusca, Tarcinio la Antica, ia susede Anco Marcio. Lo ia es proposada ce Roma ia es invadeda par la etruscas, ma esta ia es nonprobable. La site ia es locada en un loca de defende fasil e sua crese rapida ia atrae la poplas de tota la area. La politica libraliste de la site ia constitui un oportun per un gidor capas de gania la trono.

Apare de la plebe[edita | edita la fonte]

La plu frecuente, la abitores de la sites concistada ia permane. Sua vive dial es sua sistem de governa resta la mesma, ma sua sites ia perde sua nondepende a fas de Roma. Par contrasta, alga ia veni a Roma. Per oteni un state economial e legal viable, la nova arivores ia debe aseta depende de un familia patrisio o de la re (ci es un patrisio); los ia deveni la clientes de un familia patrisio. Los ci ia depende de la re ia es librida de sua depende. Esta ultima ia constitui la popla comun prima.

En cuando Roma ia crese, plu soldatos ia es nesesada per concista. La nonpatrisios ia parteni a la mesma curia como sua padrones. En esta tempo, la armada es organizada fundinte se en la curias, tal ce la individuas dependente de familias ia debe luta. Par contrasta, cuando los ia es librida de sua depende, los lasa la curia a cual sua padron ia parteni. Los no ia es obligada a luta ma ia perde sua state political e economial.

Per fa ce la popla comun reveni a la armada, la patrisios ia debe fa sedes, de cual on no conose la natur. Un de la resultas ia es ce la popla comun ia pote posese sua teras propre. Los ia ave interesa en defende la site: si lo ta es concistada, los ta perde sua teras. Par contrasta, los no ave potia political. Tota esta elementos ia gida a la gera de ordines su la Republica.

Reorganiza de la armada par Servio Tulio[edita | edita la fonte]

Per fa ce la popla comun reveni a la armada, la re Servio Tulio ia aboli la sistem antica cual ia organiza la armada fundinte su la curias e la cambia per un sistem fundida en la propria de teras. Seguente la reorganiza de Servio Tulio, du unis nova ia es creada. La armada ia es divideda en centuriae. Organizas futur va es plu capas per es fundida en la tribus. La centuriae ia uni en un asembla nova, nomida comitia centuriata. Cuando lo ia es creada, esta asembla ia ave no potia political o de legi. Lo ia es sola usada como punto de reuni en la armada.

Republica[edita | edita la fonte]

Article xef: Republica Roman

Fini de la res etrusca e crea de la republica[edita | edita la fonte]

Buste de Lucius Junius Brutus aux Musées du Capitole.

Lucio Junio Bruto, la sobrino de la re Tarcinio la Superba, ia institui la Republica en 509 aec pos esclui Tarcinio, ci ia atenta institui un tirania. Sua maltratas ia es tal estrema ce la Senato e la popla roman vide la conseta de monarcia como odiosa. La Senato ia perde la controla de la eleje de novas su la dinastia etrusca de la Tarquinios, e lo ia es esta ataca a la autonomia de la Senato, plu ca un tirania nontolerable, ci ia fa ce la patrisios, plu ca la popla comun, ia xasa la ultima re. Tarquinio la Orgoliosa ia revolta la sites etrusca contra la republica nasente cual vinse los. Porsenna, re etrusca de Clusium, aseja Roma per restabli Tarquinio, ma ia renunsia par la ostina de la romanes. Par contrasta, alga sites roman ia desfa de la iugo etrusca en la fini de la sentenio 6 aec. La tirano ia refuja en Tusculum do el ia demanda sua fio par sposi vade a gera. Aliada de la latinas, el ia luta contra Roma en la batalia de la Lago Regilo do el ia es vinseda e ia mori a alga anios a pos en Cumas do el ia fa ce sua ospitor, la tirano Aristodemo, deveni sua eritor.

Alga lejendas sujesta ce la monarcia ia es multe diferente de la republican asente. Lo es plu probable ce un cambia gradal ia aveni. Lo ia pote ave un suverti rapida de la monarcia, ma la sola cambia direta en acel momento ia es la cambia de la re per un majistratia. La otra cambia es plu probable ce ia aveni plu progresiva ca la tradision sujeste.

Geras esterna[edita | edita la fonte]

La batalia de Lago Regilo, marca la fini de la rena de la Tarquinios en Roma. En 493 aec un alia ia es suscriveda en con la Liga Latina: la fœdus Cassianum. Lo ia fini la gera entre romanes e latinas e ia loca Roma en egalia de potia con tota la membros de la Liga latina reunida. Esta ia crea un muron sircante Roma contra la volscos e la ecuos, e ance contra la sabines. Roma ia resiste la popla de la montanias, vinsente los e oteninte sesaspara plu o min longa.

Roma e Veies ia oposa lunotra par causas economical. Grasias a Fidenes, locada a un vado de la Tiber a alta de Roma, Veies ia controla la Via Salaria e la trafica de sal en la rejion. Un prima gera, privata, ia es comensada par la Fabianes, masacrada en la batalia de Cremera. A pos, en 435 aec, Roma ia prende Fidenes a la ves prima, cual ia deveni un colonia roman, permanente en 425 aec, la anio cuando un sesaspara de 20 anios ia fini. En 406 aec Roma ia aseja Veies. La gera e la aseja ia dura tra des anios, asta 396 aec. La site etrusca ia cade en la manos de la romanes gidada par la tirano Camilo en 396 aec. Esta gera e esta prende ia es un aveni grande en la istoria de Roma: lo es la ves prima cuando la soldatos-campanianes ia resta en la armada per plu ca un anio completa, sin reveni a casa en inverno, e lo ia es la ves prima cuando, como compensa, los ia reseta un paia cual veni de un imposta nova paiada per la propriores de tera, la tributum. La teritorio roman ia dupli es Roma ia es la prima en la alia eterna entre egal con la Liga Latina, dominante la otra sites. Tal, Roma ia es nunca tan forte e no site latina no etrusca ia pare pote vinse lo.

Ma en 390 un grupo galo, gidada par Breno, ia vinse la armada roman. La ojetos relijiosa e santa ia es lasada en Caere, un alia, ante cuando la galos ia saisi Roma e aseja la Capitolio, do la defendores ultima ia resiste. Si nos crede la tradision, Roma ia es sacada, destruida e ardeda estra la Capitolio, cual ia es eroin defendeda (la episodio de la gansos de la Capitolio es multe conoseda). En fato, lo ia pote es un saca jeneral e no tan radisal como la lejenda dise. Esta saca causa un trauma per sempre a la Republica roman, e lo es posible ce la tradisiones ia es esajerada[2]. La saca de Roma es sola un aveni minor en la gera entre la tiranos de Siracusa, como Dionisio la Vea, aliadas de la galos ci ia usa los como mersenarios (si on crede la istoriste Marta Sordi), e la etruscas de Caere (ambos sites ia vole oteni la potia de la mar). La blanco de la galos ia es la etruscas, ci ia sufri multa perdes como Roma.

Concista de Italia (sentenio 4 aec e comensa de la sentenio 3 aec)[edita | edita la fonte]

La sentenio 4 aec representa un punto importante en la istoria de Roma, car la crese de Roma ia comensa asta Campania, an con la resiste de la samnites. La istoristes contempora identifia varia causas cual esplica esta cambias: la trauma de la invades galo e la la problemes seguente con la visinas, ia pare convinse la romanes a no aseta menasas e comensa la crese cual on pote a veses descrive como "imperialisme de defende".

Gera de ordinas[edita | edita la fonte]
Article xef: Gera de ordinas

La periodo cual segue la vota de la Leges Liciniae Sextiae vide la emerji de tendes xocante, como la prosimi continuante de la tribunos e la senatores. Prosima a la media de la sentenio 4 aec, la consilio de la popla comun ia validi la Lex Ovinia cual ia permete ce la sensurores deside la entrada de cualce majistrato elejeda a la Senato. La popla comun ia ave multa majistratias e sua cuantia ia aumenta en la Senato. La prosimi de la tribunos e la Senato ia fasili la crea de un aristocratia nova de la popla comun: la plu de la popla comun elejeda en la majistratias ia veni de un de esta familias de la popla comun. Esta aristocratia nova de la popla comun ia uni con la aristocratia patrisio vea, creante un aristocratia combinada.

En 287 aec la popla comun ia revolta. Per fini con lo, la Lex Hortensia ia es adotada. Esta leges ia dona fortia de lege a la solves de la popla comun sin validi de la Senato. Esta leges fa ce la patrisios no pote oposa la popla comun e donce la senatores de la popla comun ave la mesma diretos ca la patrisios. Donce, la controla de la stato no es democrata, ma cade supra la aristocratia nova de patricios e la popla comun.

Un armada de sitadanes[edita | edita la fonte]
Article xef: Armada roman

Sola la sitizanes ci ia es posesores ia ave la debe de luta per la Republica. La plu ricas ia batalia en lo como cavalores (equites), otras como peones (pedites). Pos la reformis de Marco Furio Camilo, la armada roman ia es formida con 4500 omes, incluinte la hastati, jovenes (iuniores) bon instruida en la linia prima, la principes e ance iuniores ma plu esperiosa, en la linia du e la triarii, la seniores, ci ia formi la linia ultima e la reserva. La plu povres ia combate como velites. On ia ave ance soldatos aidante, ci es soldatos sin sitadania roman ma ci aida la armada. En la armada roman un disiplina sever ia esiste.

Istoria de la concista[edita | edita la fonte]

En 390 aec Roma ia es atacada par la galos e ia sufri sua saca prima. Par la romanes, esta episodio ia es viveda como un desastre nasional. La site ia nesesa multa tempo per recovre de esta desastre[3]. Pos alga scaramuxas con sua visinas, spesial la etruscas de Tarquinia vinseda e alga sites latina rebelante, e pos luta contra atacas galo nova, Roma ia comensa la concista de Italia[4].

Roma ia pote fini sua divides sosial e ia pote proposa un model political atraosa a la aristocratas de otra sites de la Mar Mediteraneo, un ativa diplomata importante. La diplomatia ia ave un rola frecuente descurada en la concista en favore de aspetas pur militar. La deditio de Capua en 343 aec constitui la esemplo la plu bon: per benefica la proteje roman, la site de Capua en Campania ia libri a Roma, ci ia vide sua area de ata tradisional estendeda a la area rica Campania[5][6]. La uni de la elites es tan importante ce a veses on parla de "stato roman-campanian". Esta es un tatica esensal en la concistas futur: Roma va apoia en la aristocratias local per estende sua teritorio e el ofre a esta aristocratas la stabilia political e la asede a un scala superior. Tal, en la gera samnita prima, la romanes ia interveni, en 343 per proteje Capua de la samnitas. Los ia es vinseda en 341 aec ma Roma ia debe retira per la revolta de la latinas, ci ia menasa direta Roma.

Campanias de Piro 1 de Epiro.

Lo segue la geras latina, ci oposa Roma a la Lega Latina, sircante la teritorio roman. Un desira de la poplas latina de oteni sua autonomia ia es la causa xef de la gera. La perde la latinas vide la disolve de la Liga e la incorpora de la teritorios a la area de influi roman. En esta tempo, la latinas ia oteni diretos partal e niveles diferente de sitadania. Sua sites ia es cambiada en munisipas o en colonias. Entre 336 e 327 Roma ia intrui plu en la sude de Italia e en Campania, e ia stabli la teritorios concistada denova.

La funda roman de Fregeles en la frontera samnita e la tensas en Napoli ia provoca la reata direta de la samnitas. La desacorda ia dura tra 40 anios. La romanes ia gania la batalias prima, ma pos alga anios de gera en la fronteras, la consules roman ia deside en 321 aec porta la gera a teritorio samnita, cual ia fini con la catura de du lejiones roman per la samnota Caio Ponto en la batalia de Forces Caudin. La lutas ia fini en 316 aec e la sesaspara favore la samnitas, ci ia oteni de la romanes la sede de la colonia roman de Fregeles. La lutas ia comensa en 314 aec e Roma ia vinse un alia de samnitas, etruscas, umbras, marses hernicas, pelignas, marucinas e la volscos. La ecuos ia es proprida. En 295 aec la samnitas ia pote penetra un armada en la norde de Italia, apoiada per sua alias etrusca e umbra, ci ia es en gera contra Roma de 302 aec. Los ia profita de la presentia de la galos ci de 299 aec ia ataca Italia norde. La romanes ia vinse esta alia e la teritorio samnita ia es invadeda. Los ia sede en 290 aec, e Roma ia propri sua teritorio.

Roma ia sorti de la geras samnita como xef de Italia sentral e ia contata la sites elinica de la sude de la penisola e ci ia controla un parte de la comersia de la Mediteraneo. Taranto ia apela a la re de Epiro, Piro 1 per lenti la avansa roman. En 280 aec Piro 1 desembarca en Italia e ia vinse la romanes. La popla ancora autonom de Bruttium e Lucania ia alia con Piro, segueda de la samnitas e la re ia vinse. En la campanias en Italia, Piro ia aida la sisilianes contra Cartago. Roma alia con Cartago contra Piro, ci ia debe lasa Sisilia per alga consernas en Italia sude. Lo ia es vinseda en 275 aec, e reveni a Eprio, lasante un garnison en Taranto.

La salentinas e pisenas ia es concistada. En 265 e 264 aec Roma ia destrui la site etrusca de Volsinii e la sites etrusca autonom ultima en la sude de la rio Arno ia es ajuntada a la Republica.

Economia, sosia e organiza de Italia[edita | edita la fonte]

En esta epoca, la Republica roman ia domina un parte grande de Italia e ia permete stabli e rici per la ves prima en sua istoria. La economia roman e italian ia flori. En Roma, la instituidas ia solidi e ia diversi, la disputa de la ordinas fini, e la Stato ave un sola xef de potia: la Senato[7].

La Grande-Grèce vers 280 av. J.-C.

Pos la cade de Taranto en 272 aec, tota la teritorios de la penisola italian en la sude de la rio Arno es su domina direta o nondireta roman. De tota esta poplas e sites, nun pote resiste la armada roman, car tota los ia es desunida en tempos de pas. Roma ia porta a Italia un stablia en la comensa de la sentenio 3 aec, la mesma epoca en cual la instituidas de la Republica ia es stablida.

Tota la poplas e sites italian ia es divideda ante la intrui de Roma, cual ia manteni la diferes de cada site e cada popla, su states diferente. En tota Italia sentral e sude, sola resta "la romanes, la latinas e sua alias", la sola cual ia resta omes libre en la comunia roman. Lo es donce Roma e poplas cual ia es intera integrada, teritorios semiintegrada e la alias de Roma, en la comensa per alias entre egales cual ia deveni tratas dominada per Roma[8].

Du tipos de sitadania roman ia esiste: la sitadanes con tota la diretos cual ia pote vota e es elejeda, es propriores, reseta salario en la armada e ance la debe de servi en la armada e paia la impostas, e los ci ave tota la deretos estra vota e es elejeda como majistrato. Un parte de la latinas antica ci ia formi la Liga LAtina ia es incorporada a Roma con la sitadania. Roma ia formi multe colonias latina en locas stratejial de la teritorio roman. Esta sistem de colonia latina, do la colonas no ia es sitadanes roman ma ave alga diretos en un colonia cuasi nondependente de Roma, ia dura tra multe tempo, esente un vantajia per Roma e la colonas. La aliadas es la parte la plu basa de la strutur manejal roman. En la plu de la casos, los ia es unida a Roma en un alia nonegal, e en tota la casos, los ia debe dona a Roma alga soldatos e aparatos militar. Roma ia no debe paia los, e esta ia favore la sitadanes roman.

Tal, Roma ia sabe crea alga ecuilibra sirca lo, e un ricia cual Italia ia no conose, eliminante la nonegalias en la organiza roman.

Concista de la Mar Mediteraneo (sentenios 3 e 2 aec)[edita | edita la fonte]

Concista de la Mediteraneo ueste[edita | edita la fonte]
:a Republica de Cartago ante la gera punica un.

De 264 aec comensa la grande fronti contra Cartago cual marca un punto desidente en la istoria de Roma. Cartago, antica colonia fenisia, ia developa prima locas comersial, pos locas de suporta e colonias en tota la Mediteraneo ueste e spesial en la ueste de Sisilia con grasias a sua spirito emprendor. Roma desfida de la aspiras cartagines en Sisilia. Lo es la causa de la gera punica un cual ia dura 25 anios. La cartaginenses ia prende prima la site de Mesina, reconcistada per la romanes per surprende, provocante la comensa de la gera. Lo segue 20 anios de geras, con fortunas diversa> la prima vinses es roman, pos la punicas ia para la avanse roman. A fini Roma ia controla la mar e la vinse naval sirca la isolas Egade obliga a Cartago a suscrive un pas vergoniosa. Lo ia abandona Sisilia, pos Sardinia e Corsica e ia paga un imposta grande.

La via de invade par Hannibal.

Pos la gera punica un, Roma ia estende en Iliria, pos vinse la ligures, la insubres e redui la Galia cisalpina a provinse roman. Caratgo ia comensa sua concista de Espania, e esta espande ia preocupa Roma. ci ia fa renase la lutas en 219 aec. Ma la Republica ia trova contra el, en la eprsona de Hannibal Barca, un enemi, un politico e un militar importante. El ia vinse en la norde de Italia e ia avansa verso la sur travesante la Apeninos. Ala, el ia vinse en la batalia de Trasimeno e Cannas a las armadas roman. La sites de la sur de Roma ia alia con Hannibal, ci ia instala se en Capua. Roma ia refusa inclina e vinse en Nola e Siracusa con Marco Claudio Marcelo, pos en Espania e fine en Africa con Scipio la African, ci ia vinse Hannibal en la batalia de Zama en 202 aec. Esta ia es la fin de la gera punica du. La vensidas, ci ia perde sua poseses esterna, ia debe paga un imposto tre forte a Roma, cual ia deveni la prima potia de la Mediteraneo ueste en 202 aec. Entre la causas de la vinse roman, on pote parla re la refusa de la clase political roman de reconose es vensida, an cuando el es divideda en la stratejia cual debe segue, ofendente o defendente; la capas de enscrie romana, completante sua perdes (posante multa presionn a sua alias) la domina de la mar e la fidelia de la poplas aliada sircante Roma e de la plu de la portos de la sur de Italia.

Cartago ia es destruida en 146 aec durante la gera punica tre. An con multa revoltas, Espania ia resta roman. La Mediteraneo ueste ia es domina roman en la sentenio 2 aec, sola la futura Galia transalpina ancora no es roman, ma ia deveni provinse roman en la 121 aec acabante la concista de tota la teritorios costal de esta lado de la Mediteraneo.

Concista de la Mediteraneo este[edita | edita la fonte]
Article xef: Geras de Macedonia

Durante la gera punica du, Filipe 5 de Macedonia, alia con Hannibal Barca. La gera ia acaba en 205 aec e ia solve con la divide entre Roma e la Macedonia de Iliria, un teritorio en la costa de la Mar Adriatico per "combate la piratia". En 201 aec Roma ia comensa la gera macedonsce du con aida de casi tota la mundo elinica. Lo ia es un disputa vasilante asta la vinse roman en la batalia de Cinocefalon en 197 aec. En 194 aec Roma declara Elas "libre" e retira se de la Balcanes. La alia etolia no es sasiada con la teritorios ce Roma ia sede los e ia invita Antioco 3 de la Impero Seleucan a aida los per libri Elas de la "opresa" roman. Roma ia responde escluinte la seleucanes de Elas e vinsente los en Anatolia, obligante Antioco 3 a sinia la Pas de Apamea en 188 aec.

Pos la mori de Filipe 5 de Macedonia en 179 aec, sua fio, Perseo de Macedonia, comensa la gera macedonsce tre. En la comensa, la forsas roman ia ave difilias contra la macedonsce, ma en 168 aec la romanes ia destrui sua enemis en la batalia de Pidna. La rena de Macedonia ia es divideda en cuatro republicas dirijedas con governas pupetin cual Roma ia gida. Roma ia destrui completa un revolta macedonsce e no retira se de la teritorio, formante la provinse roman de Macedonia e establinte la potia roman de forma definitiva en la penisola elinica. Entre 149 e 146 la lega acean ance revolta se: vinse roman, sacor e destrui de Corinto. En 133 la rena de Pergamo es convertida en la provinse roman de Asia.

Roma e Italia en la sentenio 2 aec[edita | edita la fonte]

En 287 aec, la gera de ordinas ia fini con la Lex Hortensia, solvinte tal un de la plu grande problemas de comensa de la Republica. An tal, on ia ave no cambia political major entre 287 e 133 aec. La leges importante de esta periodo ia es validida per la Sento. La fin de la sentenio 2 aec ia vide un mali de la poblemas finansial per grande parte de la popla comun. En efeta, la longa campanias militar fa ce multa ta es fora de casa per luta e no pote labora sua teras, cual ia es abandonada. La cultivores peti ia bancaroti e ia va de a Senato do sua state economial permete los voti per la aspiror ci ia promete la plu bon futur. Un nova cultur de depende ia apare e va favori la asende de la plu popular.

Italia en la sentenio 2 aec, un mosaica de statos.

Durante tota la gera punica du, eseta alga abandona militar en la sur, la teritorios latina e la aliadas de roma ia resta fidosa a la Republica, e ia contribui a la fortias de la gera. Par contrasta, la sitadania roman ia es tre poca estendeda e la nonpardona e causas de revolta contra la potia sentral en Roma ia acumula. La organiza de Italia sentral no ia cambia pos du sentenios an cuando la teritorio roman ia estende tra grande parte de la Mediteraneo. Esta impedi ia fa comensa un gera interna en la comensa de la setenio 1 aec su la nom de "gera sosial" entre la romanes e sua aliadas.

La Republica ia es la sola xef de tota un parte de la Mediteraneo do la teritorios ia flori. La prende de Elas e de un parte de Asia ia aumenta la enflue de ricia tra tota la Republica. La numero de sclavos ia crese. La furni finansial seguente a tota la geras e a esta teritorios cocnistada ia es multe importante La sclavos ia deveni la motor de la sosia roman pos la gera punica du, cuando la ricas roman ia comensa a crea grande proprias (latifundium) en la provinses concistada.

Roma, cuando ia deveni gidor de Italia e xef de la sites de Elas Grande pos la gera punica du, forti sua elenismo. La elinica ia deveni la lingua du utilisada en comersia, e ance un lingua de cultur. La romanes la plu rica ia envia sua fios a scolas elinica. La prende de Elas e 146 aec forti plu la fenomeno. La arte elinica vive un renase ver en la media de la sentenio 2 aec e sua influi en la arte roman es notable. La elinici de la arte roman ia es desirada per la pais dominante[9].

Crises de la Republica (fini sentenio 2 e sentenio 1 aec)[edita | edita la fonte]

La fini de la Republica es marcada per geras sivil e esterna diversa, cual ia ave grande influe sur la economia e la sosia roman. La instituidas political republiciste ia es pico e pico vacuida de sua contenida favorente la jenerales de la armadas de veteranes ci es fidosa.

Geras interna e fini de la Republica[edita | edita la fonte]

La gera benefica xef a la ricas. La sitizanes ci es propiores peti ia es diluida, xef durante la gera punica du. Donce on ave min cultivores. La campania es covreda de pastos ruinada. La trigo emportada de Sisilia compete con acel de la latinas ci, ruinada, vende sua teras a custa basa a la propriores grande e va a Roma a junta con la popla comun urban. La familias grande constitui tal dominias enorme, la cultiverias grande, do instala campanianes ci no es propiores, la colonistes, e multa sclavos. Los forma la nobilitas, la nobilia ci ave la judorias e pleni la Senato. A lado de esta nobilia imobilior, ia apare un clase nova de comersiores ci ia rici per comersia, bancos e credito. Sua ricia permete los ave un loca importante en la ordina de la cavalores. La nobilia e la cavalores acorda esplota la impero nasente cual ia es divideda en provinses. Comersiores e judores sivil nobil ia rici se mesma sacante de forma sistemosa.

A contra, en la site, la nonemplea ia crese, la empleadas con salario ia compete con la sclavos prosedente de la teritorios concistada. Roma ia deveni un site colorosa asemblante, junta a la sitadanes roman, italianes, elinicas e sclavos librida de tota la Impero. Esta fola ia manteni un turba constante en la site. De 133 aec la tensa ia crese entre ricas e povres, spesial cuando la luso la plu scandalosa ia apare en Roma. Par contrasta, un atenta de reforma ia emerji con la Gracos, naseda en familia nobil. Los pensa ce un reformi cultival es nesesada per solvi la problem de la popla comun, ma la du fratres ia es masacrada e la reformas ia es abandonada.

La germanicas ia invade la Galia e ia crase multa veses la armadas roman. Un reforma militar profonda es comensada asetante la sitizanes no propriores, ci, asta alora, no ia ave asede a la armada roman. Un armada de povres e no-sitizanes ia sustitui a la armada de sitizanes propriores de tera, ma lo ia es un armada profesal, preparada per dedica se a sua xef e abri per el la via a la potia, spesial se el es jeneral. La armada nova ia permete a Roma e a Mario vinse du menasas.

Pos la Gracos, la aspirantes ia luta per la potia. Con la reforma militar, e sua vinses en Africa e en la Galia, Mario domina la vive political, asosiante la xefes de la partia de la popla a sua potia. En 91 aec, comensa la gera sosial, cual oposa la Senato e la italianes, ci atenta oteni la sitadania roman. Los ci ia es multa tempo en la armada ia no ateni la sitadania roman. Roma ia susede en para la rebela donante la direto de site a la aliadas ce ia no revolta e alora a tota ci ia despone la armas. A pos, Silla ia vinse la ultima sites nonreduida. A pos la gera sosial la italianes ia otenia la direto a la sitadania roman e Italia ia es unida su un sola state legal.

Ma la problemas ia continua. La instituidas republican ia no pote funsiona normal. La cavalores e la nobilitas luta inter los per la esplota de la provinses. Lo ia segue la geras sivil entre Sila e Mario, masacrante sua oposores en la stradas de Roma e fininte con un ditatur de Sila, ci ia fa reformas political importante, refortinte la potia de la aristocratas e diminuinte la de la tribunos de popla comun. A pos el ia retira se de la politica[10].

Ma rapida la nova revolta fa comensa nova misiones militar favorente la emerji de nova jenerales vinsente ci ia disputa la potia. Pompeio e Craso ia luta contra la revoltas e la enemis de Roma, con suseso. Pompeio alia con Craso e Julio Cesar en sua asende political. La tre omes ia comparti le potia e ia formi la prima truple. De 58 aec a 51 aec Julio Cesar ia concista Galia, oteninte prestijia e ricia. El pote dedica a se aspira suprema, la concista de la potia en Roma. El sabe ce ia ave la fida de sua armada e sua suportores political en Roma. Durante esta tempo, Craso ia mori lutante contra la partos en Carre en 53 aec e Pompeio profita de la asentia de Julio Cesar per es nomida consul unica per la Senato en 52 aec e fini la turba political cual secute la site. En la fini de 50 aec e comensa de la 49 aec la nobilia roman confida a Pompeio la mision de proteje Italia. Cesar, con sua armada forte pos nove anios de lutas en Galia, ia vinse Pompeio en Espania e pos en Farsalia en 48 aec. La ultima partisanes de Pompeio ia es vinseda en Africa en 46 aec. Julio Cesar resta la unica gidor de Roma pos cuatro anios de gera[11].

El ia organiza un monarcia ma sin nomi el. El ia es nomida per la Senato tirano (dictator) per 10 anios e pos per tota sua vive en 44 aec. El ia es "elejeda" consul tota la anios e es ance sensuror e ave la titulo de imperor, xef suprema de la armada. El a ance la nonviolablia de la tribuno de la popla comun. El ia reorganiza la Senato abrinte lo a familias no roman de otra provinses. El ia prativa un politica favorable a la povres: remite de detas, grande obras per beli Roma. El ia mori en la idus de marto 44 aec, per un conspira dirijeda par Marco Junio Bruto, e Caio Casio Longino[12].

Pos la mori de Julio Cesar, sua peti sobrino e fio adotada, Otavio, sua teninte, Marco Antonio e le proconsul de Galia transalpina, Lepido, ia comparte la potia e forma la triumvirato du. Sua scopo es venja la mori de sua gidor. Casio e Bruto ia es asasinada en 42 aec en la batalia de Filipos. Pos la destitui de Lepido como triunvir per Otavio, la du omes rencontra se e la luta es nonevitable. Marco Antonio e Cleopatra es vinseda en la batalia de Actio en 31 aec. Tal, Otavio ia continua sua scopo de concista la este, asta agosto 30 aec, cuando Marco Antonio e Cleopatra suiside. Otavio resta la sola gidor de Roma. La opina publica, fatigada de geras, ia reclama un governa stable, an si es autoritar.

Cuando ia reveni a la site, Otavio ia indui un nova era cual ne acaba asta la cade de Roma en la sentenio 5.

La Impero[edita | edita la fonte]

Article xef: Impero Roman

La dinastia de Julio e Claudio[edita | edita la fonte]

En 27 aec, Otaviano ia deveni la renor solitar de Roma, e ia cambia se nom a Augusto (Imperator Gaius Julius Caesar divi filius). Esta aveni es videda par istoristes como la comensa de la Impero Roman. La dinastia cual Augusto ia comensa es nomida la dinastia de Julio-Claudio, e inclui Augusto, Tiberio, Caligula, Claudio, e Nero. Su esta dinastio, Roma ia crese e deveni la potia la plu grande de la mundo per acel eda. Ma lo ia ance perde la valuas republiciste de la eda pasada.

Augusto[edita | edita la fonte]

Augusto ia colie cuasi tota la potias republiciste su se stitulo ofisial de princeps (prinse): la potias de consul, princeps senatus (xef de la senato), aedile (dirijor de construidas, sporte publica, e furni de gran), sensuror, e tribuno, incluinte la santia legal de la tribuno.

El ia diminui la influe de la clase de senatores par suporta la clase de cavalores. La senatores ia perde la direto de rena alga provinses, como Egipte. E el ia crea la Praetoriani, un armada direta su se controla, e ia crea un militaria preparada con 28 lejiones (armadas). An si Augusto ia es asente en batalias, se jenerales ia estende la impero par vinse Cantabria Aquitania, Retia, Dalmatia, Iliricum, e Panonia.

La rena de Augusto como prinse ia es multe pasosa, comparada con lo de la epoca de la triumverato. La eda es comun nomida "la pas de Roma" o "la pas de Augusto". Esta pas, e la ricia furnida par la comedas de Egipte, ia crese la popularia e donce potia de Augusto.

En la rena de Augusto "la eda oro de literatur latina" ia comensa. Poesiores e scrivores como Vergilio, Horatio, Ovidio, Rufio, Mecenate, e Livio ia es amis bon de Augusto e ia produi obras famosa e clasica.

Augusto ia continua la cambias de la calendario promoveda par Caesar, e la mense de Augusto es nomida per el. El mori en 14 ec.

Tiberio[edita | edita la fonte]

La omes cual Augusto ia prefere per segue el - se sobrino Marcelo, se ami e jeneral Agripa, e se neto Gaio Cesar, ia mori ante Augusto. Influeda par se sposa Livia Drusila, Augusto nomida Tiberio (un fio de se sposa de un otra sposi) como se eritor.

La Senato ia acorda con el e ia dona la mesma titulos, onores, e potias como Augusto. Ma Tiberio no ia gusta politica e, pos un acorda con la Senato, el retira a Capri e lasa controla de la site de Roma a prefetos de la armada. Tiberio ia es videda como un om cruel e lo es posible ce el ia comandada la mata de se relatas, la jeneral Germanico, e se propre fio. Tiberio mori en 37 ec.

Caligula[edita | edita la fonte]

La imperor seguente ia es Caligula. El ia es popular en la dui prima de sua rena, ma ia deveni plu cruel e cisa demente. Suetonio ia dise ce el ia fa insesto con sua sores, ia mata alga omes sola como un diverti, e ia nomi un cavalo per un consul.

La Pretorio ia mata Caligula a cuatro anios pos la mori de Tiberio, e ia proclama Claudio, la tio de Caligula, como la imperor nova. Claudio ia es un renor plu razonante, e ia concista Licia e Tracia e ia comensa la invade de Britan. Ma el ia es venenida par sua sposa, Agripina minor, en 54 ec.

Nero[edita | edita la fonte]

Se eritor ia es Nero, la fio de Agripina e se sposa pasada, car la fio de Claudio, Brttanico, no ia es ja adulte. Nero ia es posible la prima perseguor de la cristianistes e la causa de la Foco Grande de Roma. El ia defeta multe rebelores, estra lo conduida par Servio Sulpicio Galba. La senato ia declara Nero un enemia, cual resulta en se suiside

La dinastia de Flavio[edita | edita la fonte]

La dinastia de Flavio ia es la dinastia du cual ia rena Roma. En 68 ec, Roma no ia pote reveni a un republica, e donce un imperor nova ia es nesesada. Pos un anio en cual cuatro imperores ia rena, Tito Flavio Vespasiano ia prende controla de la impero. Su se rena, Roma ia continua crese.

Vespasiano[edita | edita la fonte]

Vespasiano ia es un jeneral su Claudio e Nero e ia combata contra la iudes en la gera prima entre la iudes e Roma. Pos prende controla, el ia repara multe partes de Roma destruida par la foco grande, e la capital ia comensa regania se gloria. El ia comensa ance la construi de la Amfiteatro Flavian, conoseda aora como la Coloseo. El ia envia armadas a Capadocia per defende la frontera este, ia estende la ocupa de Britan, e renovida la sistem de imposta. El mori en 79 ec.

Tito[edita | edita la fonte]

Tito ia rena per un periodo corta, de 79 a 81 ec. En esta periodo, el ia completa la Coloseo e promove juas cual dura 100 dias. El ia construi un linia de vias e fortreses a la borda de Germania, e se jeneral Gneo Julio Agricola ia concista Britan a la borda de Scotland moderne. Ma se gera contra Dacia ia es un defeto vergoniante. Tito ia mori de un febre en 81 ec.

Domitiano[edita | edita la fonte]

Domitiano ia es la frato de Tito. Domitiano ia es plu un autocrata ca se frato. El ia gusta pensa de se como un Augusto nova e un dio. El ia construida du templos per onora Jupiter. La nobiles no gusta se rena e Domitiano ia es matada par un conspira en 96 ec.

La dinastia Nerva e Antonino[edita | edita la fonte]

En la renas de esta dinastia, Roma ia ateni se culmina de teritorio e susede economia. La cualias desirada per un imperor ia deveni se virtuas como un roman, e no la lias de familia. E no geras interna o defetas militar ia aveni en esta eda.

Nerva[edita | edita la fonte]

Seguente la mata de Domitiano, la senato ia eleje Nerva per teni la dinia imperial. El ia es un conselor per Nero e la Flavianes. Se rena ia restora multe de la librias cual Domitiano ia sutrae e ia comensa la eda oro final de Roma.

Trajano[edita | edita la fonte]

Pos la mori de Nerva en 98 ec, la jeneral Trajano deveni imperor. La popla de Roma ia bonveni la rena de Trajano, e el ia recompensa se zelo par rena bon. El ia concista Dacia e ia defeta re Decebalo, ci ia defeta la armadas de Domitiano. El ia ajunta ance Nabatea per forma la provinse de Arabia Petrea. El ia comanda la construi de multe construidas cual esiste an oji: la Foro de Trajano, la Mercato de Trajano, e la Colona de Trajano. Plu, arcos de vinse ia es construida en Ancona e Benevento, e un ponte supra la Danubio, desiniada par se arcitetor favorida, Apolodoro.

La gera final de la rena de Trajano ia es contra Partia. Partia ia nomi un re per Armenia ci la romanes no gusta, e Trajano ia declara un gera contro los. El ia marxa a Armenia e ia depone la re. En 113, el ia vade sude e ia vinse la sites de Nisibis e Batne, cual ia es parte de Partia, e ia crea la provinse de Mesopotamia. En la mesma anio, el ia prende Seleucia e Ctesifon, la capital de Partia, e el ia para un revolta par la iudis. Ma pos estas, el ia debe retira se ativias per razonas de sana, e el mori de edema.

Hadriano[edita | edita la fonte]

Trajano ia nomi Hadriano per imperor. Hadriano ia retira tota fortes militar de Partia e Mesopotamia. El ia evita tota geras e ia comensa construi fortreses e murones como lo entre Britan e la barbares de la pais aora nomida Scotland. El ia promove cultur, spesial la cultur de Elas, e ia proibi tortura. El ia construi multe acuadutos, banios publica, bibliiotecas, e teatros, e ia viaja a la plu de la provinses per esamina se infrastrutur e situas militar.

Antonino Pio[edita | edita la fonte]

Pos la mori de Hadrian en 138 ec, Antonio Pio ia deveni imperor e ia continua la projetas de Hadriano, la promove de artes e siensas, e la construi de construidas publica. El ia estende la rena en Britan par invade Scotland sude e construi la Muron Antonino. El mori en 161 ec.

Marco Aurelio[edita | edita la fonte]

Marco Aurelio, conoseda como la Filosofiste, ia es la final de la Sinco Bon Imperores. El ia es un filosofiste de la scola stoica e ia scrive un libro, Meditas. El defeta la impero de Partia, e la tribus barbar en a Geras Marcomani. Se coemperor, Lucio Vero, ia mori en 169 ec, posible un vitim de la Pesta Antonin cual mata cuasi sinco milion persones tra la impero de 165 asta 180 ec.

De Nerva a Marco Aurelio, la impero ia ateni un state felis e gloriosa, con influes potiosa de leges e cortesia e un respeta per la ideales de la Impero Roman. Esta eda de la Sinco Bon Imperores ia es videda como la eda oro de la Impero.

Commodo[edita | edita la fonte]

Commodo, la fio de Marco Aurelio, ia deveni imperor pos la mori de se padre. El no es videda como un de la Sinco Bon Imperores. El no ia partisipa en la atas militar de se armadas, ma en loca ia partisipa en la combatas de la gladiatores. La state de la impero ia comensa dejenera.

La dinastia de Severo[edita | edita la fonte]

Commodo ia es matada par un conspira en 192 ec. La anio seguente ia es conoseda como la Anio de la Sinco Imperores: Pertinax, Didio Juliano, Pescenio Niger, Clodio Albino, e Septimio Severo ia luta per la ro de imperor. Ultima, Severo ia institui se como imperor. El e la imperores seguente ia pote governa con a suporta de la armadas, cual ia es recompensada bon per esta suporta. La custas ia resulta en la crise finansial de la Crise de la Sentenio Tre.

Septimio Severo[edita | edita la fonte]

Severo ia deveni imperor pos invade Roma e comanda ce Didio Juliano es mata. Se otra competores, Pescannio Neger e Clodio Albino, ia es declarada como imperor, ma Severo ia defeta ambos. El ia atenta revive autocratia e ia declara a la popla e la senato se amira per la cruelia de Mario e Sula, cual ia asusta la senatores.

Cuando Partia ia invade teritorio Roman, Severo ia declara gera contra lo. El saisi la sites Nisibis, Babilon, e Seleucia, e ultima Ctesifon, la capital. Pos esta susedes, el ia fali concista Hatra, un site rica arabi. Pos esta defeta, el ia retira. El ia atenta ance concista la caledonianes en Britan. Pos multe de soldatas ia es matada, el mesma ia entra la batalia. Ma el ia deveni malada e mori en 211 ec.

Caracala[edita | edita la fonte]

Pos la mori de Severo, se fio Caracala ia deveni la imperor. El continua la politica de se padre e ia es respetada par la armadas. Ma el ia es un renor cruel e mata multe persones, incluinte persons como se ensenior e un ami de se padre. La sitadanes de Alexandria ia odi el. Donce, el ia invita la nobiles de la site a un banceta grande. Pos lo, se soldatos ia mata tota la invitadas, marxa a la site, e mata la plu de la sitadanes de Alexandria.

En 212 ec, el presenta la Proclama de Caracala, cual dona sitadania roman a tota omes libre abituante la impero. Caracala ia es matada par un de soldatas en un campania en Partia en 217 ec. Publio Septimio Geta ia rena per cuasi un anio.

Macrino, Elagabalo, e Severo[edita | edita la fonte]

Macrino, un prefeto de la Pretorio, ia comanda la mata de Caracala, e el ia prende titulo. Se rena ia fini un anio plu, cuando Elagabalo, un relatada de Severo, ia gania la suporta de la armadas e defetada Macrino. Ma el ia es un renor noncapas e estravagante, e Alexandro Severo, se cusin, ia prende la trono. Alexandro ia batalia contra Persia e la germanianes, ma no ia susede. La soldatos ia deveni nonsasiada par el, e ia mata el en se campania en Germania en 235 ec.

La crise de la sentenio tre[edita | edita la fonte]

La impero divideda en la anio 271 durante la crise de la sentenio tre. On pote vide la Impero de Galia en verde e la Impero de Palmira en jala.

Pos la mata de Alexandro Severo, la stato roman ia sufri geras interna, invades esterna, caos political, depresa economial, e pandemicas. El loca de la tradisiones de Roma vea, Mitraisme e Cristianisme ia sperde tra la popla. Imperores no ia es plu la nobiles de familias antica, ma soldatos de otra partes de la impero cual ia deveni imperores par geras interna.

On ave 26 imperores en un periodo de 49 anios, un indica clar de nonstablia political. La fronteras ia deveni abandonada e la economia ia declina rapida. La Pesta de Ciprian ia comensa en 250 ec e ia mata un parte grande de la popla. En 260 ec Siria Palestina, Asia Minor, e Egipte ia separa de la Impero Roman e deveni la Impero Palmiran, renada par rea Zenobia. En la mesma anio, Postumo crea la Impero Galian, cual inclui Britan.

La crise ia comensa decrese su la renas de Claudio Gota (268-270), ci defetada la invadores la gotas, e Aurelian (271-275), ci ia reconcista la Imperos Galian e Palmiran. Fina, en la rena de Diocletiano, un renor capas, la crise ia para.

La impero - anios final[edita | edita la fonte]

Diocletiano[edita | edita la fonte]

En 284 ec, Diocletiano ia es nomida imperor par la armada de la este. El ia establi un forma nova de governa: la tetrarcia. La impero ia es divideda entre cuatro imperores, du en la ueste e du en la este: Diocletiano en la este, Maximiano en la ueste, e, como imperores minor, Galerio en la este e Flavio Constaninio en la ueste.

Diocletiano ia esclui la Persis ci ia saca Siria. Con Maximiano, el ia concista alga tribus barbar. El ia adota alga abituas de renore de Asia ueste, como porte perlas e robas e sandales oro. El ia demanda ce cada person en la presente de la imperor debe proni se, un abitua cual ia es nunca usada en Roma a ante.

Diocletiano ia es ance culpable per alga persegue de cristianistes. En 303 ec, el e Galerio ia comensa la persegue e ia comandada la destrui de tota eglesas, adora, e scrives cristianiste.

Diocletiano e Maximiano ia renunsia la rol de imperor en 305 ec. El ia es la imperor prima ci ia fa tal. Se rena ia fini la forma ofisial de rena imperal - la principate - e ia comensa la dominate, de la parola latina per "mestre".

Constantino e Cristianisme[edita | edita la fonte]

Constantino ia deveni tetrarca en 306 ec. El ia defeta la Francos e la Alemani entre 306 e 308. El ia luta contra la otra tetrarcas, e en 312, el ia defeta Maxentio. En 324, el ia defeta un otra tetrarca, Licinio, e ia controla la tota impero, como ante Diocletiano.

El ia converti a cristianisme e en 313 per sasia se madre, ci ia es un cristianiste, e el ia dona libria a la cristianes en la Proclama de Milano. Per selebra se vinses e la rol nova de cristianisme, el ia comanda la reconstrui de Bizantio, e renomida lo Roma Nova. Lo ia deveni la capital nova de la Impero, e lo ia comensa es clamada Constantinopolis, per la imperor. Roma mesma ia perde se rol sentral de la capital pos la Crise de Sentenio Tre.

Pos se mori en 337, cristianisme ia es declarada la relijio ofisial de la impero.

Cade de la Impero[edita | edita la fonte]

Areas de la provinse roman de Hispania ocupada par la barbares.

La imperor Teodosio (388 - 395) ia divide la Impero entre se du fios - Arcadio e Honorio - en du partes cual va es conoseda como Impero Roman Ueste e Impero Roman Este. La Impero Roman Este ia es multe rica e avansada cultural e ia survive per mil anios plu (en un forma reduida), asta 1453. La invadores barbar ia entra la Impero Roman Ueste, e la ultima imperor de la Ueste, Romulo Augustulo, ia es desponida en 476 par la gota Odoacro. Esta aveni es videda como la comensa de la Eda Medieval. La Impero Ueste ia es divideda entre xefs barbar e gerores roman, e la sitadanes ia es reduida a sclavia, campanianes feudal, e artisanes povre en la restas de la sites grande.

Geografia e organiza teritorial[edita | edita la fonte]

De se nase, Roma antica ia estende de se loca orijinal, pd, la site de Roma, cual ia resta la capital de la sivilia, asta la se limites plu grande, cuando ia controla 5 900 000 km² sirca la Mediteraneo.

Provinses[edita | edita la fonte]

Article xef: Provinses roman

En Roma antica, un provinse (latina: provincia, pl. provinciae) ia es la unia manejal e teritorial la plu grande de la Impero estra Italia asta la Tetrarcia (293 ec).

La provinses ia es governada per politicistes de la senato, usual consules pasada. Un eseta a pos ia es la provinse de Misre, corporada par Augusto pos la mori de Cleopatra; lo ia es governada per un politiciste de la cavalores sola, cisa como discoraji a la aspiras de la senatores, Esta eseta ia es unica ma no oposante la lege roman, car Misre ia es considerada la propria personal de Augusto, seguende la tradision de la res elinistica pasada.

Fronteras[edita | edita la fonte]

Article xef: Fronteras roman

La limes ia es la defende de la frontera o la sistema de limita de Roma antica. Lo ia indica la limitas e la provinses de la Impero Roman.

La limites roman la plu notable ia es:

Governa e politica[edita | edita la fonte]

La governa e politica de la romanes ia developa e cambia en la anios multe de se esiste. Comensante como un tribu simple, lo ia deveni plu sofisticada en la Republica. An si la tradision ia es un governa par tota omes roman, la familias rica ia deveni cresente potiosa e ia forma un oligarcia.

En la eda de la Impero, la potia ia move cresente a individuas de esta familias, ultima en la forma de un princeps ("prinse"), un imperor con potias multe grande e sola controlada par la aspiras e desiras de otra grupos e individuas, spesial la militaria.

A la fini de la Impero, la governa ia deveni fendeda entre "cesares" e "augustos" e multe renores plu peti. Alora, la Impero ia deveni preda per jenerales e barbares diversa.

Demografia e sosia[edita | edita la fonte]

Clases sosial[edita | edita la fonte]

La clases sosial en Roma antica ia es ierarcial, ma lo ia esiste ierarcias sosial supraponida. La state de un roman naseda libre en la Republica ia es stablida per:

  • asendentes
  • grado en la conta de abitores
  • ateni de onoras
  • sitadania

Familia[edita | edita la fonte]

La unia fundal de la sosia roman ia es la casa e la familia. La casa ia inclui la testa (usual la padre) de la casa, pater familias (padre de la familia), sua sposa, fios, e otra relatadas. En la clases alta, sclavos e servores ia es ance parte de la casa. La potia de la testa de la casa ia es suprema (patria potestas, "potia de la padre") sur aceles vivente con el: el ia pote forsa sposi (usual per mone) e divorsa, vende sua fios como sclavos, declara la propria de sua dependentes como sua propre, e an la direto de puni o mata membros de la familia (an si esta direto ia sesa es eserseda pos la sentenio 1 aec).

Economia[edita | edita la fonte]

Roma antica ia ave un enorme teritorio con estrema recursos natural e uman. La economia roman ia es focada en eleva, cultiva e comersia. La comersia cultival libre ia cambia la desinia de Italia, e la ajunta de Egipte, Sisilia e Tunisia en Africa norde furni continuante con gran. Olivas e vino ia es la esportas xef de Italia.

Industrias e fabricas ia ia es poca. La plu grande de esta ativias ia es la mina e escaveria de petras, cual ia furni materias basicas de construi per la construidas de la periodo. En la fabricas, la produi ia es a scala peti, e jeneral ia es composada de laborerias e fabricerias peti cual ia emplea a masima a desduple laborores. Par contrasta, alga fabricerias de brices ia emplea a plu ca sento laborores.

Cultur[edita | edita la fonte]


Jeografia
Cosini
Vide ance
Portal

Lo ia es la resulta de un intercambia importante entre sivilias diferente: la cultura elinica e la culturas developada en la Este (xef Mesopotamia e Egipte) ia contribui a formi la cultura e la arte roman. Un de la veculos ce plu ia contribui a fa universal la cultura roman ia es la latina, lingua comun de tota la Imperio. en la du sentenios pos la gera de Augusto, la Impero Roman ia ateni se estende masima e ia fa se labora de sivili. La cultura roman ia estende a la provinses plu distante de la Impero.

Arte[edita | edita la fonte]

Article xef: Arte de Roma antica

La mostras un de arte roman ia nase su influe de la arte etrusca e ia es ance influeida par la arte elinica cual ia conose en la sude de Italia, concistada par Roma en la sentenios 4 e 3 aec. La influe elinica es plu grande cuando Roma ia concista Macedonia e Elas en la sentenio 2 aec.

Musica[edita | edita la fonte]

La musica roman ia es basada en la musica elinica, e ia ave un parte importante en multa aspetas de la vive roman. En la esersito roman, la instrumentos musical como la tuba ia es usada per dona caria comandas, contra ce la bucina ia es usada en rituos.

Arciteta[edita | edita la fonte]

En se grados inisial, la arciteta roman antica ia refleta elementos de stilos arcitetal de la etruscas e la elinicas. Injenia sivil e construi ia developa e ia refina. La stilo arcitetal de la capital ia es imitada par otra sites su controla roman. La testo de Marco Vitruvio Polio, De architectura ("Sur arciteta") ia resta un testo clasica asta la Renase.

Cosini[edita | edita la fonte]

Lingua[edita | edita la fonte]

Article xef: Latina (lingua)

La lingua de la romanes ia es la latina. Se alfabeta ia es basada en la etruscan, la cual a es basada en la elinica.

An cuando la latina ia es la lingua scriveda xef de la Impero Roman, la elinica ia es la lingua parlada per la personas importante, car la plu grande parte de la libros lejeda par la romanes ia es scriveda en elinica. en la media este de la Impero, cual ta deveni la Impero bizantian, la latina nunca ia pote recambia la elinica e pos la mori de Iustinian, la elinica ia deveni la lingua ofisial de la governa bizantian. La crese de la Impero ia estende la latina tra Europa, e la latina vulgar ia evolui a dialetos en locas diferente, cambiante gradal a la linguas romanica.

Leteratur[edita | edita la fonte]

Article xef: Leteratur latina

La scrivores de la Republica Roman e la Impero Roman evita inova e ia favore imita de la autores elinica.

La majoria de testos ce nos ave oji de la leteratur latina es de la latina clasica. En la media este de la Impero Roman, cual is deveni la Impero bizantian, elinica ia es la lingua franca xef como ia es durante la rena de Alexandro la Grande, ma la latina ia es usada per la dirije roman e la soldatos. A fini, elinica ta sustitui la latina como lingua scriveda e parlada en la Impero Roman Este, contra ce la dialetas de la latina vulgar ia deveni la linguas romanica diferente parlada oji: portuges, espaniol, catalan, franses, italian e romanian.

Siensa[edita | edita la fonte]

Siensa no ia ave un grande developa en Roma en teoria o rexerca pur, limitante la autores roman a compila anoses presedente, xef de la elinicas: Plinio la Major (23-79) ia compila se Naturalis Historia de la siensa elinica.

Instrui[edita | edita la fonte]

Instrui en Roma antica, de la ultima sentenios de la Republica Roman, ia es un macina relatada con la clases sosial alta, cual ia dona a se fios un instrui simil al elinicas.

Relijio[edita | edita la fonte]

La romanes ia es politeiste. Le relijio roman mostra la mesma elementos venida de otra sivilias cual la resta de se mostras cultural. La relijio elinica ia ave un grande influe en la crea de la panteon roman.

La relijio roman anticin, ia es composada de naras nonscriveda ma interelatas complicada entre la dios e la umanas. Nonsimil a la mitolojia elinica, la dios ia no es personida, ma ia es spiritos santa nomida numina. La romanes ia crede ce cada persona, loca o cosa ia ave sua propra genius o sprito divin. Durante la Republica Roman, la relijio roman ia es organizada su un sistema sever de ofisias de pretes.

Vestes[edita | edita la fonte]

En Roma antica la vestes servi por distingui la clases sosial. Per esemplo, la senatores roman ia usa la calceus, un sapato cual sola esta clase ia usa. Per la romanes la vestes ia ave un grande sinifia political.

Referes[edita | edita la fonte]

Vide ance[edita | edita la fonte]

Bibliografia[edita | edita la fonte]

Istoria[edita | edita la fonte]

  • Briquel, Dominique (2002), La Prise de Rome par les Gaulois, PUPS, Paris
  • Le Glay, Marcel (1990/2005), Rome, grandeur et déclin de la République, Éditions Perrin, Paris
  • Nicolet, Claude (2001), Rome et la conquête du monde méditerranéen, 264-27 av. J.-C., PUF, Paris
  • Roman, Danièle (2000), Rome: la République impérialiste (264 - 27 av. J.-C.), Éditions Ellipses
  • Abbott, Frank Frost (1901), A History and Description of Roman Political Institutions, Elibron Classics, ISBN 978-0-543-92749-1

Jeografia[edita | edita la fonte]

  • Scarre, Chris (1995), The Penguin Historical Atlas of Ancient Rome, Penguin, London

Arciteta[edita | edita la fonte]

  • Bonicatti, Maurizio. De la Grèce à Byzance. Paris: Librairie Hachette, 1963, p. XI-XIII
  • Claridge, Amanda. Rome: an Oxford archeological guide. Nova York: Oxford University Press, 1998
  • Corassin, Maria Luiza. "Sociedade e política na Roma antiga" São Paulo: Atual, 2001, pág. 82 a 99
  • D'Agostino, Mário Henrique (2010) A Beleza e o Mármore, São Paulo: Annablume.
  • Coarelli, F. Rome and Environs. An Archaeological Guide. Berkeley: University of California Press, 2007 (original em italiano)
  • Favro, D. (1996) The Urban Image of Augustan Rome. Cambridge: Cambridge University Press.
  • Kleiner, F. S. (2007) A History of Roman Art, Belmont, CA: Thomson Wadsworth.
  • Macdonald, W. L. (1982/1986) The Architecture of the Roman Empire, 2 vols. New Haven and London.
  • Mendes, Norma Musco. Romanização e as questões de identidade e alteridade. Conflito social na História da Antiguidade: stasis & discordia-Boletim do CPA, IFCH/UNICAMP, v. 11, n. jan./jun., 2001
  • Onians, J. (1992) Bearers of Meaning: Classical orders in Antiquity, the Middle Ages and the Renaissance. Princeton University Press.
  • Pevsner, Nikolaus. An outline of European Architecture. Great Britain: Penguin Books, 1966, p. 19-56
  • Wheeler, Mortimer.Roman Art and Architecture.London: Thames and Hudson, 1964
  • Zschietzschmann, Willy (1963) Histoire de l'art: Étrusques, Rome. Paris: Payot.

Cosini[edita | edita la fonte]

  • André, Jacques (1981) L'alimentation et la cuisine à Rome, Paris: Les Belles Lettres.
  • Blanc, N. & A. Nercessian (1992) La cuisine romaine antique, Grenoble: Glénat.

Sosia[edita | edita la fonte]

  • Andreae Bernard (1973) L’Art de l’ancienne Rome, Paris: Mazenod.
  • Christophe Bade (2005) La noblesse de l'Empire romain. Les masques et la vertu, Seyssel: Champ Vallon.
  • Breaugh, Martin (2007) L'Expérience plébéienne. Une histoire discontinue de la liberté politique, Paris: Payot & Rivages.

Relijio[edita | edita la fonte]

  • Beltrão, Cláudia (2011) Interações religiosas no Mediterrâneo romano:práticas de acclamatio e de interpretatio. Rio de Janeiro.
  • Beltrão, Cláudia (2011) Interpretatio, solo e as interações religiosas no Império Romano. In: GONÇALVES, A.T. et al. Saberes e Poderes. Rio de Janeiro.
  • Beltrão, Claudia. A Religião na Urbs. In MENDES, Norma Musco; SILVA, Gilvan da Ventura (orgs.). Repensando o Império Romano: perspectiva socioeconômica, política e cultural. Rio de Janeiro: Mauad; Vitória, ES/; EDUFES,2006, p. 137-159.
  • Beltrão, Claudia (2011) Lectisternium: Banquente ritual e ordem sagrada na Roma Republicana. In: CANDIDO, M. R. História da Alimentação na Antiguidade. Rio de Janeiro: NEA/UERJ.
  • Eliade, Mircea (2011) História das crenças e das ideias religiosas, Rio de Janeiro: Zahar.
  • Funari, Pedro Paulo (2002) Grécia e Roma, São Paulo: Contexto.
  • McKeown, J.C. (2010) O livro das curiosidades romanas, São Paulo:Gutenberg.
  • Mendes, N.M.; Otero, U. (2005) Religiões e as Questões de Cultura, Identidade e Poder no Império Romano,Rio de Janeiro: Phoînix.