Engles (gramatica)

De Vicipedia

La gramatica de engles es un corpo de regulas cual descrive la strutur de espresas en la lingua engles. Engles ave multe varias istorial, sosial e rejional, cual difere de la gramatica asi descriveda.

Engles ave oto clases de parolas: nomes, determinantes, pronomes, verbos, ajetivos, averbos, preposadas e juntas. Nomes, verbos, ajetivos e averbos es clases abrida, cual aseta fasil membros nova. La otras es clases cluida. Per esemplo, lo es rara ce un pronom nova entra a la lingua. Parolas en engles no es normal marcada per clase, e alga es membros de plu ca un clase. Per esemplo, run pote es usada como un nom o un verbo. A la otra lado, engles ave multe afisas de deriva cual causa un cambia de clase.

Parolas combina per formi formulas. Un proposa normal servi la mesma funsiona como un membro de un clase de parolas. Per esemplo, me ami Pedro es un formula cual pote es usada en un frase en la mesma modo como un nom, e donce lo es nomida un formula nomin. Simil, formulas ajetivin e formulas averbin funsiona como ajetivos o averbos. Un formula verbal es composada de un verbo con cualce ojetos o otra dependentes; un formula preposadal es composada de un preposada con sua completinte, e es la plu comun usada como un tipo de formula averbin.

Nomes[edita | edita la fonte]

Nomes formi la clase de parolas la plu grande en engles. On ave multe sufisas comun per formi nomes de otra nomes o de otra tipos de parolas, como -hood, simil como -ia en elefen. Nomes pote ance es creada par converti de verbos o ajetivos, como talk, cual funsiona esata como parla en lfn.

Nomes en engles no ave seso gramatical, e en esta modo no sembla la plu de otra linguas indo-european, an si alga nomes refere spesial a persones o animales mas o fema (pe: mother e father). Nomes pote es clasida par sua sinifia semantical como nomes propre e nomes comun (pe: China e frog). Los pote es ance clasida como nomes concreta e nomes astrata (pe: book e heat). Un distingui gramatical es lo entre nomes contable e nomes de masa (pe: clock e milk). Nomes contable ave normal formas singular e plural. En la plu de casos, la forma plural es creada par ajunta -s o -es, como en elefen. Formas noncoerente esiste ance (pe: foot e feet), e un pico de parolas no distingui entre singular e plural (pe: sheep).

(Vide nomes en engles)

Nomes engles no es marcada per caso, como en alga otra linguas. Ma los ave formas de posese, formida par la ajunta de -'s (pe: children's) o con sola un sinia de elidi (') en la caso de parolas plural cual fini en -s o -es (pe: dogs), e alga parolas cual fini con -s.

Formulas nomin funsiona gramatical como nomes en frases, per esemplo como la sujeto o ojeto de un verbo. La plu de formulas nomin ave la nom como sua nucleo. Un formula nomin tipal ave la forma asi:

  • Determinante + Pre-alterantes + Nom + Post-alterantes/Completinte

En esta strutur:

  • La determinante pote es un article (the, a/an) o un parola egal. En multe contestos, un determinante es nesesada.
  • Pre-alterantes inclui ajetivos e alga formulas ajetivin e nomes usada como alterantes. Ajetivos presede normal sua nomes.
  • Un pos-alterante o completinte pote es un formula preposadal, un proposa ajetivin, alga formulas ajetivin o partisipial, o un proposa dependente o proposa infinitival cual conveni a la nom.

Un esemplo:

  • that + rather attractive + young + college + student + to whom you were talking
    • det + pre-alt (formula aj) + pre-alt (aj) + pre-alt (nom alt) + NOM + post-alt (proposa nomin)

En engles, formulas nomin pote es aposada, cuando du formulas nomin refere a la mesma cosa), per esemplo "the president Abraham Lincoln" (la presidente Abraham Lincoln).

Otra formulas cual pote es usada como un formula nomin:

  • formulas formida par la determinante the con un ajetivo (pe: the homeless, the English). Estas es regardada como plurales;
  • formulas con un pronom como la nucleo, en loca de un nom;
  • formulas formida de un sola pronom de posese (pe: mine is bigger);
  • formulas de infinitivas o jerundios (en alga locas);
  • alga proposas, per esemplo proposas seguente that (ce) e proposas ajetivin (pe: what he said).

Determinantes[edita | edita la fonte]

Determinantes en engles es un clase peti de parolas. Los inclui:

  • la articles (the, a/an, e en alga contestos some);
  • alga parolas de mostra (this, that…);
  • alga parolas de demanda (who, what, which…);
  • determinantes de posese (my, your, his, her, our, their, whose…, e incluinte formulas de posese como John's e the girl's);
  • parolas de cuantia (all, many, few…);
  • numeros (one, two…)

Determinantes pote es usada en alga combinas, per esemplo all the water e the many problems.

Determinantes debe es usada en multe contestos per completi un formula nomin. On no pote dise cat sat on table, ma debe dise alga cosa como my cat sat on the table. Ma, si un nom refere a un clase intera o a un conseta (pe: dogs are dangerous, beauty is subjective) o con un nom propre, on no usa un determinante.

Pronomes[edita | edita la fonte]

Pronomes es un clase peti de parolas cual opera en la loca de nomes o formulas nomin. Los inclui pronomes personal, pronomes de mostra, pronomes de relata, pronomes de demanda, e pronomes nondefininte.

La pronomes personal de engles, e sua formas de posese, es:

  Sujeto Ojeto Refletante Determinante de posese Pronom de posese
pers 1 sing I me myself my mine
pers 2 sing you you yourself your yours
pers 3 sing she, he, it her, him, it  herself, himself, itself  her, his, their, its hers, his
pers 1 plur we us ourselves our ours
pers 2 plur
you
you
yourselves
your
yours
pers 3 plur they them themselves their theirs

Jeneral, la person du es you per e singular e plural. Ma en alga dialetos, la plural difere: en la SUA sude, on usa you all o y'all; en alga locas, on usa you'uns; e en multe locas, on usa youse o you guys. Un forma vea de la person du singular es thou, thee, thyself, thy, thing. Los es comun en leteratur vea, como la naras de Shakespeare, e en lingua relijiosa.

La person tre singular ave tre varias cual segue la seso natural: he es per omes e alga animales mas; she es per femes e alga animales fema (e per alga cosas tradisional regardada como fema, como barcones). It es usada per cosas, ideas, etc, e como un sujeto pupetin en frases como It is going to be sunny this afternoon. En alga situas, la person tre plural es usada como un pronom singular per evita atribui un seso a un membro de un grupo de ambos sesos (pe: each employee should ensure that they tidy their desk).

La pronomes de mostra en engles es this (plural these) e that (plural those), esata como la determinantes de mostra.

La pronomes de demanda es who (per persones), what (per cosas), e which (per eleje entre posibles). On pote ajunta -ever a tota per asentua la idea de eleje. La forma ojetal de who es whom, ma lo no es comun usada: on reusa who en loca. Tota pronomes de demanda es ance usada como pronomes de relata.

La pronomes de relata introdui proposas ajetivin. En engles los es who (e sua derivas whom, whose, whoever), which e that. Who refere a persones. Which es usada per cosas. La pronom segue la nom o formula nomin cual lo altera, e es segueda par la proposa ajetivin (pe: the man who gave the present…). Si la pronom es la ojeto de un preposada en la frase seguente, la preposada con la pronom es moveda a la comensa de la proposa ajetivin (pe: the man to whom I gave the present…) Ma nota ce un ordina multe plu comun es the man whom I gave the present to, the man who I gave the present to, e, multe comun, the man I gave the present to.

Whose indica posese e pote es usada per e persones e cosas (pe: the man whose car I borrowed).

That pote refere a e persones e cosas, ma no pote segue un preposada, cuando on debe usa who o which. Si that no es la sujeto de la proposa ajetivin, on no debe usa lo (the song I listened to yesterday).

La parola what es ance usada per introdui proposas cual pare como proposas ajetivin, ma no ave un nom a cual los refere — pd: per introdui proposas nomin (I like what he likes).

There es usada como un pronom pupetin en alga frases, tipal con un verbo nontransitiva. La sujeto lojical de la verbo apare como un completinte pos la verbo. La usa la plu comun es per indica la esiste de alga cosa (there is a heaven en loca de a heaven exists; there have been a lot of problems lately en loca de a lot of problems happened lately). Normal, la verbo indica esce la sujeto "lojical" es singular o plural, ma la corti there's es comun en loca de there are.

There pote es inversada en demandas como otra sujetos: Is there a test today?

Otra pronomes en engles es comun la mesma como la determinantes, como many, a little, etc. En alga casos, la pronom difere, pe: none, nothing, everyone, somebody, etc.

Verbos[edita | edita la fonte]

Vide ance: Verbos engles

Verbos es la clase du en cuantia, pos nomes. La forma fundal de un verbo engles no es normal marcada par un coda. Ma on ave alga sufisas cual es comun usada per formi verbos, como -ate, -fy, -ise/-ize, etc. Multe verbos ave ance prefisas como un-, out-, over-, under-, etc. Alga verbos pote ance es creada direta de nomes e ajetivos, pe: snare, nose, dry, calm, etc.

La plu de verbos ave tre o cuatro formas infletada:

  • la person tre singulal fini en -s/-es (pe: writes, botches);
    • la verbos have, do, say ave un person tre singular noncoerente (has, does, says – la du final es pronunsiada daz e sez)
  • la partisipio presente e la jerundio fini en -ing (pe: writing);
  • la tempo pasada e, en la plu de verbos, la partisipio pasada fini en -ed (pe: botched);
    • sirca 100 verbos noncoerente ave formas diferente per la partisipio pasada (pe: written).

La verbo be ave la cuantia la plu grande de formas noncoerente (am, is, are per la presente, was, were per la pasada, e been per la partisipio pasada).

La forma continuante de verbos es composada de formas de be con la partisipio presente en -ing: am/is/are/was/were writing.

La forma perfeta es composada de formas de have e la partisipio pasada: have written, have been written….

La futur es construida con will e la radis de la verbo: will write, will be writing, will have written…. Shall es usada en loca de will en alga situas e dialetos.

La forma dependente ("conditional") es composada par usa would en loca de will, con la radis de la verbo: would write, would be writing, would have written…. Should es usada en modo simil, con un sinifia cual inclui la idea de obliga.

La infinitiva es la radis de la verbo (pe: be, write, play), e es usada par se mesma o pos to. On pote usa ance otra formas, como (to) have written, (to) be writing, etc).

La verbo de comanda per la person du es ance la radis. La sujeto es normal ometeda. Otra comandas pote es formida con let (pe: let's go, let them eat cake).

La sujunta presente no es multe usada, estra alga espresas tradisional. Lo es la mesma como la infinitiva. La sujunta pasada, ance no multe usada, esiste sola per be: if I were rich.

La vose pasiva es formida par usa la verbo be (en la tempo o otra forma cual conveni) con la partisipio pasada de la verbo: he was killed, I have been hurt, etc. La sujeto orijinal pote es reintroduida a la frase par usa un formula preposadal con by (pe: he was killed by an intruder).

Engles ave un colie peti de verbos modal, incluinte can, could, might, must, shall, will, would. Estas no cambia per person o numero e no ave formas infinitival o partisipial. Los es segueda par la infinitiva, sin to. Otra verbos modal es segueda par to, como dare to, need to, ought to, used to e have to. Esta verbos, como ance be, no funsiona como otra verbos en demandas e cuando negada. Per esemplo, on debe dise could he walk? e no did he could walk?, he couldn't walk e no he didn't could walk, are you coming? e no do you be coming?, he isn't coming e no he does not be coming.

Un frase es negada par usa la paroleta not. Lo es poneda ante la verbo major, ma pos cualce verbo modal o aidante. En demandas con not, on manteni la mesma ordina (should he not pay?). Ma la plu de verbos modal ave cortis cuando negada (don't, can't, isn't, etc), e en parla normal, los continua como cortis an en demandas (shouldn't he pay?). Per la plu de verbos, la forma negada es construida par usa formas de do: I don't sing, he didn't walk, etc.

Si otra parolas negante (pe: never, nobody, nothing, etc) es incluida en la frase, on debe no usa not/-n't - o, si on vole usa not/-n't, on no pote usa esta otra parolas, car engles no permete negas duple. Ma si on usa not/-n't, on pote usa parolas afirmante (pe: ever, anybody, anything, etc) en la frase per replica la sinifia de usa parolas negante sin not/-n't. Per esemplo:

  • they don't hurt people
  • they don't hurt anyone
  • they never hurt people
  • they don't ever hurt people

Per la plu de verbos, demandas es construida par usa ance formas de do ante la sujeto: did he walk?, does John sing?, didn't I already tell you that?, etc. La responde pote inclui la do o no: he walks/he does walk, John sings/John does sing, etc. Natural, la do es incluida si la responde es negada: no, he doesn't walk. Si la frase inclui un verbo modal o be, on usa acel verbo modal en loca de do, pe: can she dance? am I on time?, etc.

Si la sujeto de un demanda es un pronom de demanda, la verbo segue la sujeto, como en frases direta: who is going tonight?

Nota ce engles ave multe cortis per verbos como be, do, e have, como isn't, don't, haven't e I'm, he's, they've, etc.

Un verbo, con sua dependentes, es un formula verbin. La dependentes pote es ojetos, completintes, averbos e formulas averbin. La ojetos e completintes segue normal la verbo. Si un ojeto nondireta es incluida, sin un preposada, lo apare entre la verbo e la ojeto direta. La ojeto nondireta pote ance apare pos la ojeto direta, ma alora lo debe segue la preposada to. Jeneral, averbos e formulas averbin segue la ojetos.

Ajetivos[edita | edita la fonte]

En engles, ajetivos no es marcada par sua forma. Ma multe ajetivos es derivada de nomes o otra parolas par sufisas como -al, -ful, -ic, -ish, -ous etc.

Ajetivos pote es usada como alterantes en un formula nomin (pe: the big house) o en la formula verbin (pe: the house is big). Alga ajetivos pote es sola usada en la un modo o la otra: a drunken sailor, the sailor was drunk.

Multe ajetivos ave formas de compara e superioria con -er e -est (pe fast > faster > fastest). Esta es la norma per ajetivos corta e comun. Per ajetivos plu longa o rara, on usa la averbos more e most a ante (pe: beautiful, more beautiful, most beautiful). Engles ave ajetivos noncoerente: good ave better, best, bad ave worse, worst, e far ave farther/further, farthest/furthest.

Ajetivos per cualias cual no pote es comparada (como pregnant) e ajetivos per cualias ja estrema (como terrified) no pote ave grados de compara o superioria, estra per efetos comica o metafor.

Un formula ajetivin es un grupo de parolas cual ave la rol de un ajetivo en un frase. Normal, lo ave un ajetivo como sua nucleo, con alterantes e completintes ajuntada. Ajetivos pote es alterada par un averbo o formula averbin a ante: very warm, more than a little excited. Alga pote ance es presededa par un nom o espresa de cuantia: fat-free, two-metre-long.

Completintes cual segue la ajetivo pote inclui estas:

  • formulas preposadal (proud of him);
  • formulas infinitiva (easy to pick up);
  • proposas (certain that he was right, unsure where they are);
  • pos comparas, espresas con than (better than you).

Un formula ajetivin pote inclui e alterantes a ante e un completinte a pos, como en very difficult to put away.

Un formula con un completinte pos la ajetivo no pote normal es usada como un alterante ante la nom. En alga casos, lo pote es usada como un alterante pos la nom, como en a woman proud of being a midwife. Alga completintes pote es poneda ante la nom, con la ajetivo ante la nom (better than you, hard nut to crack). Final, alga proposas ajetivin pote es formida de otra clases de parolas, como en a two-bedroom house, a no-jeans policy.

Adverbos[edita | edita la fonte]

Averbos altera normal verbos o formulas verbin, ajetivos o formulas ajetivin, o otra averbos o formulas averbin. En alga casos, los altera formulas nomin (only the boss, quite a lovely place), pronomes e determinantes (almost all), formulas preposadal (halfway through the movie), o an frases completa (frankly, I don't believe you). Los pote ance mostra un relata entre du proposas o du frases (he died, and consequently I inherited the estate).

Multe averbos engles es formida de ajetivos par la ajunta de -ly (pe: hopefully, widely, theoretically, etc). Un pico de parolas pote es usada como e ajetivos e averbos (pe: fast, straight, hard). La ajetivo good deveni well. On ave ance multe averbos cual no es derivada de ajetivos, incluinte averbos de tempo, frecuentia, loca, grado e otras. Alga de los deriva de nomes con sufisas como -ward (pe: homeward) e -wise (pe: lengthwise).

La plu de averbos ave formas de compara e superioria cual usa more e most a ante la averbo. Un cuantia peti ave formas noncoerente: much, more, most; a little, less, least; well, better, best; badly, worse, worst; far, farther/further, farthest/furthest. E alga segue la formas normal per ajetivas corta: fast, faster, fastest; soon, sooner, soonest; etc).

Averbos cual indica la modo de un ata es normal poneda pos la verbo e sua ojetos, an si otra locas es comun posible:

  • We considered the proposal carefully.
  • We carefully considered the proposal.

Multe averbos de frecuentia, grado e sertia es normal poneda ante la verbo, estra cuando un verbo spesial introdui la verbo major, un caso en cual la averbo vade entre la du:

  • They usually have chips.
  • She can usually manage a pint.
  • We are never late.

Final, la averbos cual indica tempo es comun poneda a la comensa de la frase:

  • Yesterday we went on a shopping expedition.

Un spesie spesial de averbo es lo contenida en un verbo estendeda (pe: pick up, get on, etc). Si un verbo-averbo combina como estas ave un ojeto, la averbo pote presede o segue la ojeto. Si la ojeto es un pronom, la averbo es normal pos la ojeto:

  • Pick the pen up.
  • Pick up the pen.
  • Pick it up.

Un formula averbin es un formula cual ata como un averbo en la frase. Lo pote ave un averbo per sua nucleo, con sua alterantes e completintes (pe: very sleepily, oddly enough, etc). Un otra spesie de formula averbin es un formula preposadal, pe: in the pool, after two years, for the sake of harmony, etc.

Preposadas[edita | edita la fonte]

Preposadas es un clase cluida de parolas, ma los inclui ance alga espresas cual pote ata como preposadas (pe: in front of). Un preposada pote ave sinifias variosa, comun incluinte sinifias tempal, spasial e astrata. Multe preposadas pote ance ata como averbos. Esemplos: of, in, on, over, under, to, from, with, in front of, behind, opposite, by, before, after, during, through, in spite of or despite, between, among, etc.

Un preposada es normal usada con un formula nomin como sua completinte, e la du partes es nomida un formula preposadal. Un formula preposadal pote es usada como un completinte o alterante pos un nom (pe: the man in the car, the start of the fight); como la completinte de un verbo o ajetivo (pe: deal with the problem o proud of oneself); o como un formula averbin (vide a supra).

Engles permete la usa de un preposada abandonada. Esta aveni en proposas de demanda e proposas ajetival, en cual la pronom de demanda o pronom relatante es moveda a la comensa e la preposada a sua loca orijinal. Esta strutur es evitada en alga formas de engles formal. Per esemplo:

  • What are you talking about?
  • The song that you were listening to…

Preposadas abandonada aveni ance en la vose pasive e en otra usas de formulas con la partisipio pasada. En esta casos, la completinte de un formula preposada pote desapare en la mesma modo como un ojeto direta de un verbo: it was looked at, I will be operated on, get your teeth seen to. La mesma pote aveni en alga usas de formulas infinitiva: he is nice to talk to, this is the page to make copies of.

Juntas[edita | edita la fonte]

Conjuntas espresa multe relatas lojical entre parolas, formulas, proposas e frases. La conjuntas xef en engles es and, or, but, nor, so, yet e for. Los lia du o plu cosas de la mesma spesie, per esemplo:

  • du o plu nomes o formulas nomin: John, Eric, and Jill; the red coat or the blue one. Nota ce determinantes pote es repeteda o no.
  • du o plu ajetivos, formulas ajetivin, averbos o formulas averbal: tired but happy, over the fields and far away.
  • du o plu verbos o formulas verbin: he washed, peeled, and diced the turnips (con un ojeto compartida); he washed the turnips, peeled them and diced them (con la ojeto reintroduida pos cada verbo).
  • otra cosas egal liada, como prefisas en pre- and post-test o numeros en two or three buildings.
  • proposas o frases liada, como we came but they wouldn't let us in; they wouldn't let us in, nor would they tell us why.

Engles ave ance conjuntas corelatada, en cual un parola es ajuntada ante la cosa prima:

  • either … or (either a man or a woman);
  • neither … nor (neither clever nor funny);
  • both … and (they both punished and rewarded them);
  • not … but, not only … but also (not exhausted but exhilarated, not only football but also many other sports).

Juntas suordinante (o sujuntas) indica relatas entre proposas, e fa ce la proposa en cual los apare deveni un proposa suordinada (un suproposa). Per esemplo:

  • sujuntas de tempo: after, before, since, until, when, while.
  • sujuntas de causa e efeto: because, since, now that, as, in order that, so.
  • sujuntas de oposa o sede: although, though, even though, whereas, while.
  • sujuntas de depende: if, unless, only if, whether or not, even if, in case (that).
  • la sujunta that, cual produi suproposa de conteni: she told us (that) she was ready (nota ce that pote es ometeda).
  • sujuntas cual introdui un suproposa de demanda: whether, where, when, how.

Un sujunta normal aveni a la comensa de sua suproposa, an si multe pote es presededa par averbos (pe: probably because …, especially if …)

Elidis[edita | edita la fonte]

En engles, on pote omete verbos en un responde si los es ja indicada en un conversa.

  • On pote omete un verbo a sua verbo aidante: I can, he isn't, we mustn't.
  • Si no verbo modal ia aveni con la verbo orijinal, on pote usa "do": I do, he does, they didn't.
  • En alga respondes, on pote omete an la "do": me too, me neither.
  • On pote fini un demanda con un coda simil simplida: It's nice, isn't it? There weren't any, were there? I like it, don't you?
Gramaticas

AitianArabiCatalanDeutxElefenEnglesEspaniolEsperantoFransesGotoInterlinguaItalianLatinaOsitanRomanianRumansRusceTibetanXines