Cosmolojia norsce antica

Mysselhøj, un tumulo dansce de la eda de bronze temprana, prosia a la vila Roskilde, refleta la universo como imajinada par la popla norsce

Ante la crea de la mundo, lo ia esiste un spasio vacua, Ginnungagapa. A cada lado de lo ia es du rejiones: Muspell ia es briliante e flaminte, tro calda per viventes; e Niflheim, fria, nevosa, e neblosa. Ginnungagapa, alora un fesur entre la jela e la foco, deveni plen de masas de neblas jelin de Niflheim, e masas de sintiles de foco de Muspell. Cuando los encontra lunlotra a la media de Ginnungagapa, la prosede de cosmolojia ia comensa.

Entre Niflheim e Muspell, la jela e la foco, ia es un loca pasosa, "tan temperada como un sielo sin venta". Cuando la jela e la foco encontra lunlotra, la misca produi la esente prima, Ymir, la asendente de tota jotunes. Ymir ia sui cuando el dormi, e de sua brasos e gamas ia crese jotunes mas e fema.

Ymir ia bevi de rios de lete cual flue de la tetas de la bove primeval, Audumbla. Audumbla ia leca la sal de la rocas. Tra tre dias, el ia leca tan multe ce el libri un om bela e fore nomida Buri. La fio de Buri, Borr, ia sposi un jotun nomida Bestla, e la du ia ave tre fios: la dio Odin, Vili, e Ve. La fios ia mata Ymir.

Odin, Vili, e Ve ia prende la corpo de Ymir a la sentro de Ginunngagapa e ia talia el. Los crea la tera de sua carne, la rocas de sua osos, e la mares e lagos de sua sangue. Los ensirca la tera con mar, forminte un sirculo. De la cranio de Ymir, los crea la sielo, cual los pone supra a tera en cuadro dirijes, cada tenida par un nano (Nordri, Sudri, Austri, e Vestri - norsce vea per, e la orijinas de, norde, sude, este, e ueste).

Esentes personida, como los de ojetos astronomial, tempo, e corpos de acua aveni comun en mitolojia norsce. La Sol es personida como un diva nomida Sol; la luna ia es personida como un dio, Mani; e la Tera es ance personida como Jord (norsce vea Jörð, "tera"). La note es la jotun fema Nott; la dia es Dag ("dia"); La padre de Dag, la dio Delling ("briliante") pote representa la leva de la sol. Corpos de acua ance es personida. Per esemplo, la diva Ran e sua sposo Aegir, e sua nove fias, representada par ondas.

Yggdrasil es un arbor sentral a la conseta norsce de la universo. La ramos de la arbor estende a la renas variosa, e viventes variosa abita sur e sirca lo. La dios vade a Yggdrasil cada dia per asembla a sua tinges. La arbor es suportada par tre radises cual estende distante a otra locas: un a la fonte Hvergelmir, un a la fonte Mimisbrunn, e un a la poso en la sielo, Urdarbrunn. Abitantes de Yggdrasil inclui la dragon Nidhogg, un agila no nomida, e la servos Dainn, Dvalinn, Duneyr, e Duratror.

Testas norsce vea nota la esiste de Niu Heimar, traduida como "nove mundos". Seguente la poesia Voluspa en la Edda poesial, la nove mundos ensirca Yggdrasil. Lo no es clar si los es locada un supra un otra o ordinada sirca la arbor, ma on ave referes a la mundos esistente su la arbor, con la dios abitante en la sielo, con un ponte composada de la arco de sielo Bifrost liante la arbor con la otra mundos.

La naras norsce no lista clar la nove mundos, ma un lista posible, construida par Henry Adams Bellow (1923):

• Asgard, abitada par la dios de la aesir
• Vanaheim, abitada par la dios de la vanir
• Alfheim, abitada par la elfos
• Midgard, abitada par la umanas
• Jotunheim, abitada par la jotunes
• Muspellsheim, la mundo de foco, abitada par la jotunes de foco
• Svartalfaheim, abitada par la elfos oscur o negra
• Niflheim (o Hel), orijinal la mundo de jelo, abitada plu tarda par la mor
• Nidavellir, la mundo de oscuria, abitada par la nanos

Ask e Embla - mas e fema en ordina - ia es la du umanas prima - creada par la dios de lenio flotante cual los ia encontra sur un plaia. La dios ci forma esta du umanas varia en fontes variante: Seguente la Voluspa (en la Edda poesial), los es Haenir, Lodur, e Odin; en la Edda prosal, los es Odin, Vili, e Ve.

Ragnarok es un serie de avenis futur, incluinte un batalia grande, cual predise la mori de multa figures major, incluinte dios, la aveni de desastres natural, e ultima la inonda de la mundo. A pos, la mundo va reveni nova e fertil a la surfas, la dios survivente va asembla, e umania va es repoplada par Lif e Lifbrasir, ci va emerji de la interna de Yggdrasil. Lo es posible ce la popla norsce ia crea, a min como un idea nasente, en un serie de crea e destrui, como alga otra ramos de la popla indoeuropean.